Vaute 29 In Siata – East Lairam Lampi Cu Khar A Si Lai
Vaute 29 In Siata – East Lairam Lampi Cu Khar A Si Lai, ”2023 Vaute 22 ah kan tiram khuasa minung pathum Pi Biak Sui, Pu B. Lalthafamkima le Pu Bablu cungah tuksum thil a can hi a poi kan ti ngaingai, zawnruahnak le hmaizahnak ngeilo in kan ram in an hruai hna hi kan ramchung cia ah an nunnak a liam hi kan thin a runh ngaingai i hi thiltuah hi kan dohkalh fawn. Thilsual tuahtu hi kan cozah nawlngeitu hna nih a rianrannak in kawlhawl in, fak pi’n hremnak pek piak dingin kan duh”.
”Chiatnak tongmi chungkhar hna MTP Sub- Headquarters: Chhaolô nih lungthin tak in kan in tuarpi hna, hi vanchiat tonnak nihhin a kan runh ngaingai. Pathian tu nih in hnem in, in umpi hram hna seh tiah thla kan in campiak hna”.
”Kan ram ah vanchiatnak a tlun hi kan duhlonak langhternak caah MTP Sub-Headquarters: Chhaolô ramchung lana, Lôbô, No-aotlah le Siata khua ah East Lairam he i pehtlaihnak lam cu 2023 Vaute 29 thawkin bianolh a um hlan cu khar dih a si rih lai”.
”Kan theih bantukin nai ah Mara ram ah rithaisii drugs, zu, etc. a tam ngaingai, kan mino hna rithaisii ah an i foih, hi bantuk rithaisii hi Myanmar in luhpimi a si. Hi bantuk thilthalo le tihnungmi lakah ram zapi kan himnakhnga kan nih MTP Sub-HQ: Chhaolô nih East Lairam he kan i pehtlaihnak lam hi phihrih dingin biakhiahnak kan tuah”.
”A cung i kan langhter mi hi kan ram a himnakhnga le a lamkip in nitin nunduhdimnak in kan hman khawhnakhnga timhtuahnak kan ngeihmi a si. Zapi nih nan kan ruahthiamnak lai le dirkamhnak lai kan in nawl hna” tiah MTP Sub-HQ Chhaolô nih cathanh an chuah.
