Mizoram Ah Kawl Le Lai Ralzaam Adventist Development and Relief Agency nih bawmh lai

Mizoram Ah Kawl Le Lai Ralzaam Adventist Development and Relief Agency nih bawmh lai, Myanmar ram ralhraang nih nawlngeihnak an laktimh thawk in Mizoram ah a zaammi hna Kawl le Lai ralzaam hna cu Adventist Development and Relief Agency nih an bawmhchanh hna lai.

Hi kong he pehtlai in nihin ah Champhai Zipeng meeting tuahnak hall ah ‘Protection and Humanitarian Assistance to new arrivals from Myanmar in Mizoram 2023’ cu Adventist Development and Relief Agency le Champhai District Level Committee on Myanmar Refugees hruaitu hna tonnak an ngei.

Adventist Development and Relief Agency nih Mizoram pengkomh 4 ah ralzaam bawmhnak nikum in a thawk i tukum ah pengkomh 4 le Champhai, Aizawl pengkomh ralzaam a bawmh lai.

Hi bawmhnak ding hi nitin herhhai, ngandamnam lei, sianginn kai ngakchia ca le Children Friendly Space serchuahnak zong a tel lai.

Hi tonnak ahhin Champhai pengkomh khua 47 ah Kawl le Lai ralzaam 10226 an um, pa 3033 le nu 3929 an um. Ralzaam camp dihlak 37 lakah 13 cu 2021 ah sakmi an si i, 21 hi 2022 ah sakmi an si.

Ralzaam minung 2643 hna hi ralzaam camp ah an um i, minung 7584 hi hmun dangdang ah an thudir. Champhai pengkomh ah ralzaam 9488 cu Temporary ID an chuah piak hna, a dang 738 cu tuahpiak cuahmah lio an si. Mizoram huap ah Kawl le Lai ralzaam thongsawmthum leng an um.

Adventist Development and Relief Agency hi India ram ah kum 1992 ah hmunhma an la i a tu ah cun ram 138 ah hmunhma an la cuahmah.