Lawngtlai ah Mizoram Legislative Assembly Deputy Speaker Pu H. Biakzaua nih LAHAS Hostel building thar a on

Lawngtlai ah Mizoram Legislative Assembly Deputy Speaker Pu H. Biakzaua nih LAHAS Hostel building thar a on, Nihin ah Mizoram Legislative Assembly Deputy Speaker Pu H. Biakzaua nih North Eastern Council (NEC) tangka in sakmi, Lawngtlai AOC Venga Lairam Higher Academy of Science (LAHAS) Hostel building thar cu a on.

Hi caanhmannak ahhin Pu H. Biakzaua nih LAHAS Hostel building thar tha sak a si khawhnakhnga cozah nawlngeitu le zohkhenhtu hna cungah lawmhbia a chim. Cozah nih ram le zapi thanchonak caah chawva a ui lo, Lawngtlai District zongah thanchonak caah tuancangmi a um bantukin tuan cuahmah mi zong a um. LAHAS cu Khrihfabu nih zohkhenhmi si ko hmanhseh thiamnak le fimnak chuahnak thawng in ram le zapi thanchonnak caah sianginn dirh a si bantukin ram caah a biapi tukmi a si.

LAHAS Hostel building thar onnak le lawmhnak caanhmannak hi Lawngtlai District Rural Development Office, Project Director Pi Marilyn Rualzakhumthangi nih hruai in, Lairam Isua Krista Baptist Kohhran (LIKBK) Associate General Secretary (S), LAHAS Managing Board Chairman simi Rev. Dr LH Lalpekhlua nih caanzarh a hman. Lawngtlai Zipeng Pu David Lalthantluanga nih LAHAS Hostel building saknak ding le Lawngtlai District chungah thanchonak riantuannak ding ah NEC lei in fund a phanhning le District Administration in hmalak a sinak kong a chim. LAHAS Hostel building thar sak cu inn pakhat sak men siloin, Hostel building thar in cawnglio hna nih hlawhtlinnak le ram thanchonnak caah pangpar a si khahwnakhnga a chim.

Hi caan ahhin Lawngtlai DRD office, Assistant Engineer Pu FC David Biakthansanga nih technical report a pek. LAHAS cawnglio nih ””Lahasians thuvawn 12″ an chim i, LIKBK Assembly Choir nih “Maw Bawipa, na thluachuahnak sung” timi hla an sak. Lawngtlai DRD office Programme Assistant (DEGSU) Pu R. Malsawmdawngliana Khawlhring nih lawmhbia chim in caankhar a si.

LAHAS Hostel building thar hi Lawngtlai AOC Veng LAHAS complex-ah sak a si i 30% NEC budget allocation for Backward Community of Lai Community, 2021-2022 tangah tangka hmuh ₹ 52,04,160/ in sak a si. Hi rian hi Lawngtlai DRD office zoh in, a satu Contractor cu Pu Lalzahawma Cinzah, Lawngtlai a si. 2022 Vaute 28 in hramdomh a si i, 2022 Dipa 3 ah lim a si.

LAHAS hi LIKBK sianginn a si i, kum 2017 khan dirh a si. Mizoram Board of School Education (MBSE) Government of Mizoram School Education Department lei in Dt. 07.02.2018 khan Science Stream cawnnak le Dt. 10.01.2022 khan Arts Stream cawnnak thawk khawh dingin siannak (permission) hmuh a si. Class XI le Class XII cawnnak um in, tu dirhmun ah Class XI (Science)-ah cawnglio 15, Class XI (Arts)-ah cawnglio 15, Class XII (Science)-ah cawnglio 17 le Class XII (Arts)-ah cawnglio 7, an dihlak cawnglio 54 an um.

Nihin LAHAS Hostel building thar onnak ahhin LADC member hna, state le LADC official hna, LIKBK Khrihfabu hruaitu hna, zaanghleicawi hna, ramkhel lei hruaitu hna, media hna le LAHAS cawnpiaktu hna le cawngliomi hna le sawmmi hna an i tel.