Pu No Lal Ling Laiholh Thiamnak Dingah Lai Baibal Rel, Laihla Sak
Pu No Lal Ling Laiholh Thiamnak Dingah Lai Baibal Rel, Laihla Sak ” Thantlang khua in Lawngtlai ah kan hung zaam, zeiruangah Lawngtlai theng hi kaa thim tiahcun Lawngtlai cu Lai khualipi a si caah Laiholh an thiam lai ti ruahchannak he ka hungphan. A zaan cu kan it, a thaizing ah ” In Tho Tha Em ” an kan ti, an ka chawnh ning cun ” Tho Tha Ee” tiah ka leh hna. Nohawng thla ah khan ka innchungnu a ța nih a kan liamtak, sangmi hna le Khrihfabu nih an kan thutpi, cu i ka chimmi cu ralzaam ti’n hung kan nek hlah u, nanmah zong mipem nan si ve ko, Lawngtlai kek ngai nan si lo tiah ka chim”.
” Kum 1890 Nohawng 26 ah mirang ralbawi Thau khua ah tonnak an ngei i, tichak lei hi Burma, tithlang lei hi India tiah then in ca an țialmi cu General Simon sinah phanhpi in March 13 ah India le Burma tiah then a si. Cu hlan ah cun kan tangka aa khat holh aa khat ti ko usih, cu nithawk cun chak le thlang tiah kan i then”.
” Laiholh ah uiril zamkanh, lasen zamkanh timi a um, hlan lio ah Hakha khi tlak hnuah Mizoram hi tlak a si. I tuk i thah i nawn a um, khuathlang phan Mar nih an hung doh lengmang hna caah, khuachak lei nih an dawi hna i tipi ral an phan, tahchunhnak in chim ah cun Pangkhua lei tipi ral an phanh ah, uiril an zamkanh hna, lasen an zamkanh hna, zeitik hmanh ah hung ti hlah uh, nan rat ahcun nan thi lai chiat nan si lai tinak a si”.
” Hlan ah cun Lushai Hills a si i tu ah cun Mizoram ah a um, Mizo ti hi 1954 in um dawh a si. A si pek silo pek ah Mizoram timi a um hlan ah Lushai ti an duh lo caah Mizo ah an thlen”.
” Kawlram ummi nih Kawl nawl i cawn a um bantukin Mizo nunphung hrawm a um ve, man rel tikah Lai phung siloin Lawngtlai phung nan ti ahcun hmailei ah cun miphun sining a lo ziahmah lai”.
”Kan kalnak kipah tung le lung kan phun a hau, chanhnih chanthum ah tlau a fawi hih. Nohawng ah Hlukhla a um, cun Tho kan ngeih fawn, mah vialte hi a tlau dih te lai timi mitthlam ah a cuangcia tulio kan sining hin cun”.
”Lai caholh thiam i miphun kilven ah cun zak lo te’n nan kalnak kip ah chim thluahmah u, Mizo holh cu nan duh zong duh lo zongah nan thiam lai, a umnak ram nih a ngeih, midang holh thiam a poi lo, lungthin ah Lai kan si, Laiholh, Laica ka thiam hau timi nan lung ah um seh, cheukhat Pastor upat awk ngaingai an si, an upat hnuah Laiholh an thiam, Laiholh thiamnak dingah Lai Baibal rel u, Laihla sa u” tiah a chim.
The Lairam Times Kumkhat Tlinnak Ah A Chimmi Chungin Tawinak
