75 CND & CDF Matupi Fundraising Cu Zaangleknak In Thawk
75 CND & CDF Matupi Fundraising Cu Zaangleknak In Thawk, 75 Chin National Day donnak ah zaangleknak in nihin CYLA Certual ah an tuah. ” Hi an tuahnak Fund hmuhmi vialte hi CDF – Matupi sinah a lut dih lai. A nicaan a phanh Nohawng 20 ah East Lairam, Chak le Thlang Laimi vialte i fonh in sunglawi ngai in tuah a si lai ” tiah
Mizoram Matupi Refugee Central Committee Chungtuan Salai Isral Kucy nih a chim.
Zaangleknak ah aa telmi hna cu
- Vengpui Camp FC
- Bethel Camp FC I
- Bethel Camp FC II
- Saikah Camp FC I
- Saikah Camp FC II
- Council Camp FC I
- Council Camp FC II
- Canan Camp FC
- Tuipang Camp FC
- College Camp FC
- Dai FC hna an si.
Hi zaangleknak caan onnak cu thlacamnak le baitawichimnak in onnak tuah a si. Hramthawk ah Pastor Stephen nih thla a cam. Cu hnuah Salai Isral Kucy nih ” Camp rianțuantu hna dihlak thawng in CND kan tuah khawh hi a si. Hi zaangleknak hi Nohawng 14-18 tiang tuah a si lai. Nohawng 20 cu Final chuih a si lai i, CND caan zong hika CYLA certual ahhin hman a si lai.
Hi zaanhleknak ahhin hlawhtlinnak in caan hman khawh a si nakhnga ding cu zapi nih thazaang kan pek hna a herh. Zaangleknak zuamnak in CDF Matupi caah Fund tuah a si caah dawtnak le theihthiamnak he zohdawh te’n zaanglek hna usih.
Ralhraang nih nawlngeihnak an laktimh kum 3 lei kan lut cang. Hika phanmi Chin miphun hna dohthlennak ah kan i tel tinak ah tu bantukin Fund kan kawl hi a si. Raldohnak ah i tel khawh lo zong ah kan si khawhnak lam in bawmhchanhnak hi dohthlennak ah i tel hna usi ” tiah a chim.
Cun Lawngtlai Refugee Committee Chairman Sianguk Hla Pu nih ” Ralhraang nih nawlngeihnak an laktimh kum 2 a tling cang. Kum 3 nak kan luh a si. Ralhraang kanmah Chin mi lawng nih kan do lo, tlangcung mi hna le Burma mi hna zong nih an doh. Ralhrang uknak hi a herh lo caah hriamtlai in doh a si, kan fanau hna ramlak aj eidin har ngai in an um. Nihin hi ka a phanmi hna hi meithal thawng kan thei lo. Zalong ngai in kan um lio ah kan unau hna cu meithal kuan lak ah an um. Hi dohthlennak hi teinak kan hmu hrimhrim lai.
Minister Dr. Lian Hmung Sakhong nih ramleng ah a zaammi kum 20-40 kar kir dih u, raldo u, ramleng ah zalong ngai in ummi hna Chinram ah kir u a ti. Nihin i a rami hna hi kum 15-20 kar lawng kan si. A ruang tampi ruangah hriam kan tlai kho lo nain a lamkip in dohthlennak ah kan i tel timi he i bawmchan hna usi. CND taktak cu Nohawng 20 ah sunglawi te’n hman a si lai. Asinain hriamtlai unau hna tuarnak theihpi in bawmhchanhnak a si hnga maw tiah Fundraising zong tuah a si. Kan ti khawh tawk in bawmchan in tangka siseh thilri siseh hmanawktlak in bawmh an herh.Hi ralhraang zong hi kan tei hrimhrim lai ” tiah a chim.
Cun MCRC Chairman Pu Peng Lian nih “‘ mah khua le ram ah hnangam te’n kan ding kan ei lio caan ah zeiruangahdah midang ram ah kan luh, nehhnu caan ruah ah lung a fak ngaih a chia. Nihin ah ralhraang uknak a that lo caah chungkhar cio le pumpak in miram ah har ngai in kan lut. Hi bantuk kan tuah khawh lai i kan ruat bal lo, nihin ah zaanglek ding Team 11 in kan i si hi a sunglawi ngai ngai. Kan ram kan um lio ah kan khua le ram pengtlang a kaht lo, asinain miram kan luh tikah kan duh zong duh lo zongah ralzaam kan si. Cucaah ralzaam pakhat le pakhat i thleidang lo in kan i funtom hi a tha tuk. Cu lawng siloin CDF bawmhchanhnak caah zaanglek kho ding kan si hi a sunglawi, zaanglek tikah a sungmi le teinak hmumi um phung a si. Cucaah lungthin tiang te’n zaanglek hna usih. Kan lungthin a thian lo ah cun hi zaangleknak ahhin i sikvelhnak a chuak kho mi a si. Kanmah punpak ramlak ah kal in hriamtlai kho hlah hmanh usilaw hi Fund kan kawlnak nih hin miphun le ram caah thahnem santlaimi a si hrim lai ” tiah a chim hnuah Pastor Denial TABC nih thlacamnak in caan a khar.
