Thantlang Khua Dihlak Ngawt Ukpen A Si Cang – CNF
Thantlang Khua Dihlak Ngawt Ukpen A Si Cang – CNF, Ralhraang nih Martial Law an thanhnak, East Lairam, Thantlang peng ah ralhraang an umnnak LIB 269 dah ti lo a dang paohpaoh cu Lai ralkap nih ukpen a si cang tiah CNF nih an chim.
Asinain ralhraang an um rih caah le vanlawng in an kan kah rih caah khuachung ah um khawh a si rih lo tiah CNF chimnnak nawlngeitu Salai Htet Ni RFA ah a chim.
” Thantlang kan lak tiah kan ti lo, Thantlang ah ralhraang riahbuk a um rih. Hlan lio pi’n a rak ummi a si. A dang paoh paoh cu ukpen dih a si cang. A tu zongah ralhraang an um rih caah zapi khuachung luh awk a tha lo, kan dihlak kan luh i vanlawng in an kan kah ah cun zapi humhimnak a hnorsuan lai ”
A luancia Nohawng 8 ah Thantlang palek riahbuk cu CNA le CDF Thantlang fonh nih luhhnawh in hriamnam 40 leng le thilri dangdang an lak tiah a chim chap.
Ralhraang media nih cun Thantlang palek riahbuk cu CDF nih thazaang tamtuk hmang in an kah caah hliamtuar mi palek an tam caah palek riahbuk cu an chuahtak nain vanlawng in kahdoh bawmh an si i, tha te’n hnu an tolh kho tiah Nohawng 9 ah an cohlan.
Nohawng 1 ah Thantlang CB bank ah umhmun khuarmi ralhraang 6 cu CNA le CDF nih an hriamnam he an tlaih hna, vulei cung ral phunglam bantukin kilven an si tiah Salai Htet Ni nih a chim.
2021 Zing thla ah Thantlang khua ah kahdohnak a chuah hnu in, zapi inn le lo khangh piak a si caah khuami dihlak nih Thantlang an chuahtak.
Tu ah cun zapi ralkap nih khuachung dihlak an ukpen khawh hmanh ah a rawkmi remh a hauh lai caah mah le inn cio ah tlun/kir awk a tha lai lo tiah ralzaam mi nih an chim.
” A dihlak in an lak khawh hmanh ah zapi luh ding a fawi lo, kamkhat in an lak khawh i luh a si hmanh ah kamkhat in kahdoh than a si lai, vanlawng in bomb an thlak lai caah zei ti’n khua kan sak lai. Rianran in um awk a tha lai lo. Mei a um lo, ti a um lo, zalam hmanh a thla in remh a hau lai”.
Ralhraang nih Tangkawng 10 le 11 ah CNF hmunpi ah bomb an thlak i CNA ralkap 5 an nunnak a liam, sii-inn le inn dangdang an rawk.
CB bank ralhraang tlaih an si hnu zongah zapi ralkap an um theo lai ti nak ah ralhraang nih vanlawng in bomb an thlak bantukin palek riahbuk lak a si hnu zongah vanlawng in bomb a thlak.
Ralhraang nih Mindat khua cu 2021 ah Martial Law an thanh hnuah, Thantlang, Hakha, Kanpetlet, Matupi, Tedim, Tonzang, Falam peng hna cu 2023 Nohawng 2 ah Martial Law an thanh.
