Ukraine Nih Vanlawng An Halmi Cu Germany Nih Cohlang Lo
Ukraine Nih Vanlawng An Halmi Cu Germany Nih Cohlang Lo, Ukraine caah Germany ram nih vanlawng kan pe hna lai lo tiah Prime Minister Olaf Scholz nih a chim.
Russia dohnak caah nitlak ram hna cu chanthar chuak hriamnam bawmhchanh dingin Ukraine nih an halmi cungah tu bantukin Germany Prime Minister nih zarhpini ah khan a chim hi a si. Asinain Germany sermi Leopard 2 tank 14 pek ding le a dang Europe ram nih bawmhchanh cio dingin Germany Prime Minister nih a liamcia nithumni ahkhan a chim.
Ukraine cu Germany nih tank pem dingin Prime Minister nih biachahnak a tuah cang bantukin American zong nih Abrams tank 31 pek dingin a thanh. Ukraine President Volodymyr Zelenskyy nih cun Germany le American biachahnak hi kan ram caah a lianngantuk mi bawmhchanhnak a si tiah lamwhbia a chim. Asinain Russia ralkap dohnak caah NATO phu cu vanlawng, lamhlat kahnak hriamngan a herh hringhran ko tiah Ukraine President nih nawlnak a tuah chap.
Germany Prime Minister nih cun tank bawmhchanh dingmi kongah fak ngai in a dohkalhtu Russia he rallei fak deuh a chuak kho tiah ralrinnak a chim.
NATO phu le Russia kar ralthawh a si lo caah harsatnak fak a chuahnak hnga lo a biapi tiah a chim. A luancia Dipa thla ahkhan Russia President Vladimir Putin he telephone phone in i chawnhnak ah Germany Prime Minister nih Russia President he i chawnhbiak than a herh tiah forhfialnak bia a chim.
