Ukraine Hriamngan In Russia Ralkap 60 Leng Thi
Ukraine Hriamngan In Russia Ralkap 60 Leng Thi, Ukraine ram Donetsk hmunram ah Russia ukmi hmunram Makiivka khua ah Russia ralkap hna cu Kum Thar zaan ah Ukraine nih hriamngan in an kah hna i Russia ralkap 63 an thi tiah Russia lei nih nikhatni ah khan an chim. Ukraine khuapi Kyiv cu Russia lei nih van lei in kah an lio ahhin kanmah tuahmi a si lo tiah Russia runvennak zung nih an thanh.
Kyiv khuapi le kiangkap hmunram ah kahding an i hmuitinh lio ah lamhlat in tlaihhip mi Drone 40 in kan kah khawh hna tiah khuapi uktu bawi Vitali Klitschko nih a chim.
” American nih Ukraine pekmi HIMARS hriamngan le a dang hriamngan 6 in Makiivka hmunram cu pali nih a khen, pahnih cu Russia nih kan kham khawh tiah Russia runvennak zung in chimnak nawlngei Igor Konashenkov nih a chim.
Hi kahdohnak ah Ukraine ralkap lei nih fehtermi zeihmanh a um rih lo, asinain Russia nih an chimmi nak let in a thimi an tam kho tiah zumh a si.
Makiivka i riantuannak inn ah Russia ralkap 400 hrawng an thi i, ralkap 300 hrawng hliam an tuar tiah Ukraine lei nih an chim ve. Russia thanh ning ah Makiivka hmunram ah kahdohnak a um ko nain riantuannak inn kongkau cu an chim lo.
