Lawngtlai Ah Draft Electoral Roll 2023 Tlangzarh A Si
Kum 2023 special summary revision caah hman dingmi Lawngtlai District Assembly bial pathum ah draft Electoral Roll cu nihin ah Lawngtlai District Election Officer (DEO), Lawngtlai Zipeng Pu Amol Srivastava nih Lawngtlai DC Conference Hall ah a tlangzarh. Draft Electoral Roll hi Political party aiawhtu hna sinah a pekchanh fawn.
DEO Pu Amol Srivastava nih Draft Electoral Roll felfai te’n a caan te ah tlamtlinh a si khawhnakhnga riantuantu, EO le ERO/AERO le Election Branch cungah lawmhbia a chim. Kum 2023 cu i thimnak kum a si lai caah Lawngtlai District chungah Final Electoral Roll dik, felfai le zumhtlak a um khawhnakhnga Political Party le zaanghleicawi pawl nih theihtawk chuah dingin a sawm hna.
Draft Electoral Roll tlangzarhnak nih a langhter ning ah, 36-Tuichawng (ST) Assembly Constituency (A/C)-ah vote ngei pa 17,327 le nu 16,845, an dihlak ah minung 34,172 an um, 37-Lawngtlai West (ST) A/C bial ah vote ngei pa 14,061 le nu 13,880, an dihlak minung 27,941 an um, 38-Lawngtlai East (ST) A/C bial ah vote pa 12,006 le nu 12,881, an dihlak ah minung 24,887 an um. Assembly bial pathum ahhin vote ngei pa 43,394 le nu 43,606, an dihlak ah minung 87,000 an um.
Final Electoral Roll, 2022 ah 36-Tuichawng bialah voter 28 in an zor , 37-Lawngtlai West bialah voter 333 a zor, 38-Lawngtlai East bialah voter 247 a zor fawn, bial pathum ahhin a dihlak voter 608 a zor, a zornak hi 0.69% a si. Election Officer Pi B. Malsawmtluangi nih cun Booth Level Officer (BLO) nih Garuda App an hman ruangah le Aadhaar in EPIC in kalpi a si caah nunnak liam cangmi le a um ti lo mi hna hmuh le hlonh an tam, cucaahcun voter zornak hi voidangnak in a zor khunnak a si tiah a chim.
Nihin Draft Electoral Roll tlangzarhnak ahhin Electoral Registration Officer (ERO) le Assistant ERO, Political party aiawh le zaanghleicawi aiawh, SVEEP Core Committee member le SVEEP PwD icon le Student Ambassador hna an i tel.
Special Summary Revision ngeihnak ding ahhin a thar, hlonh, remhthan duhmi hna caah 2022 Dipa 8 tiang caan a um, 2023 Tangkawng 15 ah Final Electoral Roll cu tarlangh dingin timhtuah a si. LT
