Mizoram Ah Rithaisii 2021 Kumkhat Chung Tlaihmi Nakin 2022 Thla 7 Chung Tlaihmi Tam deuh
Myanmar ram he innpa a si mi, India ram, Mizoram ramkulh ah kum 2021 chungnak in kum 2022 thla 7 chung tlaihmi letkhat in a tam deuh tiah Mizoram palek le rithaisii dotu hna cazin ning in hngalh a si.
Hi kong he pehtlai in Kawl le Lai ralzaam hna zei ti’n an thutdir ning a si lai timi ah Zokhawthar palek zohfelnak lei in Inspector nih hiti hin a si.
“Ralzaam hna kuatthannak ding dirhmun tiang cu a phan lai lo tiah ka ruah, asinain hi nak tam a luh rih ahcun harnak tampi a um ko lai ” tiah a chim.
Mizoram, Champhai District palek cazin nih a langhter ning ah 2022 Chiapa 19 tiang ah Heroin tlaihnak voi 54 a chuak, aa pehtlaimi minung 70 tlaih an si. Hi tlaihmi chungah Myanmar rammi minung 21 an i tel. Hi chungah ralzaam minung pakhat ai tel tiah theih a si.
Zokhawthar khuami tuanvongei Pu Muana nih ” theihthiamnak a har ngai, ralzaam hi cu an i tel lo, ralzaam zong a si lo mi, anmah zalonnak ding caah ralzaam i ti ruangmang in mihlen hmang an tam, cheukhat nih ralzaam ti’n an i chim, tha te’n zohfelnak kan tuah tikah an min cazin kan sinah a um lo” tiah a chim.
” Kamkhat in zoh ahcun ralzaam an tam bantukin rithaisii a tam mi a lo, chawlehnaklei harsatnak ruangah tu bantukin an tuah hi zumh a um, hi dohnak ding ahcun cozah tuanvo an ngei, mino phu hna he biatak te’n rengh ahcun a tha ko lai ” tiah Zokhawthar tuanvongei Pu Mauna nih a chim.
2020 kumkhat chung Mizoram palek nih rithaisii Kg 8.738 an tlaih. 2021 ah Kg 15.792 Heroin an tlaih tiah theih a si.
Institute of Chin Affairs (ICA)
