Kum 97 Mi Malaysia Prime Minister Hlun Thimnak Ah Aa Zuam Than Lai

Kum 97 a si cangmi Malaysia hruaitu hlun Mahathir bin Mohamad cu thimnak ah aa zuam than lai tiah nihin ah an thanh. Tlaih a tongmi Najib Razak zong zalonnak pek a si lai tiah Mahathir bin Mohamad nih a chim. Mahathir bin Mohamad hi hlan i a rak i zuamnak hmun khan aa zuam than lai.

Tulio Prime Minister Ismail Sabri Yaakob nih Parliament cu nizaan ah khan a hrawh cang, thimnak tuah a si lai tiah a thanh. United Malays National Organisation (UMNO) Party he i then in, amah Party lawng nih teinak a hmuh lai ti a zumh caah tu bantukin thanhnak a tuah hi a si. Parliament hnon a si hnu ni 60 ah thimnak tuah a si lai. Tuzarh chungah thimnak ni cu thimnak Committee nih an thanh lai tiah zumh a si. Mahathir hi UMNO party chungtel a si i, kum 22 chung hruaitu dirhmun in a um i kum 2003 ah khan a rak i din.

Najib Razak nih Prime Minister a tuanchung ah rampi tangka amah duh in a hman caah kum 2018 ah Mahathir hi thimnak ah a lut i, Party pakhat ah an rak dir, a sinain kum 2 hnuah party chungah i thennak a chuah caah UMNO nih nawlngeihnak an tlaih. Hniang thla ah sungh a pemi Prime Minister hlun Najib Razak cu kum 12 chung thongtla dingin bia an khiahpiak.

Dotu an um zongah UMNO nih thimnak ah teinak a hmuh lai tiah Mahathir nih a chim.