Zelensky Le Putin G-20 Meeting Kai Dingin Indonesia Ah An Kal Lai
Russia President Putin le Ukraine President Zelensky cu G- 20 meeting kai dingin a ra laimi Sikpar thla ah, Indonesia ah an kal lai tiah Indonesia palai pakhat nih The National media ah a chim.
Hi thawngpang hi a dik ko ahcun a ra laimi G- 20 meeting ah Ukraine cu Russia nih a luhhnawh thawkin ramhnih hruaitu a voikhatnak meeting an kai a si lai tiah Russia media nih an langhter ve.
” Kaphnih kai dingin an lung a tling ko” tiah Indonesian Ambassador to the United Arab Emirates, Husin Bagis nih The National media ah a chim.
” Ukraine – Russia ral kong meeting dirhmun cu a fawi lo ” tiah Husin Bagis nih a chim i, Indonesia cozah zong nih hi ramhnih hruaitu hna meeting kai kho dingin a hlankaanh te’n timhtuahnak kan ngei tiah a chim chap.
” An nih hi zei bantuk hotel ahdah kan chiah hna lai ti aa fiang lo, hotel dang veve ah chiah an hau te lai ” tiah a chim chap.
Putin cu sawm lo dingin American President Joe Biden le nitlak ram hruaitu hna nih Indonesia President Joko Widodo cu an forhfial ko nain, President Joko Widodo nih nitlaklei forhfialnak cu cohlang lo in Russia President cu a sawm thiam.
President Joko Widodo nih thal chuah hlan ah Zelensky le Putin cu tong dingin le ramhnih hruaitu caihhmainak lamtha hmuhpiak le, ramdaihnak ser kho ding hmuitinh in sawm an si tiah Indonesia palai nih The National media ah a fianter.
