Ukraine President:Russia He Biaruah Ding A Si Kho Lo
Ukraine hmunhma 4 Russia ram ah telh dingin Russia President Vladimir Putin nih a zuam hnu in Russia President he biaruahnak ngeih ding a si kho lo tiah Ukraine President Volodymyr Zelenskyy nih nihnih ni ah khan cathanh a chuah.
Russia cozah chimnak nawlngeitu Demitry Peskov nih Ukraine President Zelenskyy a ruahnak aa thleng tiang asilo ah Ukraine ah President thar a kai tiang Russia nih kan hngah ko lai tiah thawnglatu hna sinah a chim.
Russia nih Ukraine hmunhma Russia ram i telh a timhmi kong ah American nih zeitik hmanh ah kan theihpi lai lo tiah American President Joe Biden nih Ukraine President Zelenskyy cu phone i chawnhnak in a chimh tiah American innrang pi lei nih an chim. Cu pinah Russia nih kahdohnak a tuahmi cungah a dirkamhtu a lungtlinpi tu zei bantuk ram, zei bantuk phu, zei bantuk hruaitu an si zong ah American nih fak pi’n hmalak ding ah timhcia a si tiah a chim.
American nih Russia ral in an i ven him khawhnakhnga Ukraine cozah cu rallei bawmhnak caah Dollar nuai 615 a pek lai. President Joe Biden a kai hnu in kum 2021 thawkin rallei bawmhchanhnak hi dollar nuai thong 1750 leng an dih cang.
Nihnih ni zing ah khan Ukraine ram hmun 4 cu Russia ram ah khumh dingin parliament chungah vote an thlak. Tu bantukin Russia nih hmunhma lak ding a zuammi cungah nitlak ram hna nih an dohkalh bantukin UN General Secretary Antonio Guterres zong nih phungning lo a si tiah a chim ve.
