Salai Le Mai – Salai Thomas Lian Thihlum
Lai Miphun lungrualnak ding caah a biapi taktakmi “Salai le Mai” konglam hi a tanglei ah rel ve dingin kan sawm hna.
1973-74 “Kha-Sa-Ya” nih Chin National Identity tuah dingah Chin Literature Committee t’uanvo an rak pek hna. Thla 6 chung biatak tein an rak cawlcaang. Cu lio ah cun min phunphun Taang le Lia (Tedim), Pa le Nu (Falam), Leeng le Val (Halkha), Salai le Mai (Asho)..etc… kong ah an rak buaibai ngaingai. Nain, an vun chuahpi mi min cio cu 12-11-1973 Meeting ah an ceihkhaan i, “Salai le Mai” hi National Identity caah hman ding siseh tiah bia an rak khiah. Cu thawk cun 1974 Cacawn kum Fresher Welcome ah zatuak in 90% nih “Salai le Mai” hi an rak hman cang. 1976-1977 ah “Salai le Mai Biachahnak” an rak ngei i, A cozah thawngzamhca (The Mirror) ah siseh, A cozah zungkip ah siseh, Chin State Sianginn kip ah siseh thawngthanhnak an rak ngei. Kawlram Caholh Register 0081/kha-sa-ya(77) nih phungning tein an rak thanh.
“Nihin mino, thaizing hruaitu” a simi Lai Mino hna le Lai miphun dihlak Upa le Ngakchia vialte hna nih kan Miphun Identity a simi “Salai le Mai” hi kan hman cio awk a si. “Salai le Mai” timi nih a sawh duhmi sullam cu mahti hin a si. Salai = Pasalt’ha asiloah Laipa tinak a si. Mai = Nusalt’ha a siloah Lainu tinak a si. “Salai le Mai” cu Lai miphun a simi paohpaoh LAIMI, ZOMI, K’CHO, MIZO, KHUMI, ASHO vialte nih kan hman uar cio awk Chin Identity kan Common Name (or) Common Language a si caah kan min hmai ah telh cio hna usih.
Salai le Mai timi cu Cathiam, Loothlo, Ngakchia, Pastor, Dawrhngak, Doctor, Bawhte, Upa, Cataang ngei le ngei lo timi richiah piak a um lo. Cu bantuk minung thengtheng nih Salai le Mai aa bunh khawh timi ramri a um lo. Lai miphun a simi paohpaoh kha Salai le Mai kan si colh cang. Cucaah kan dihlak in Salai le Mai i bunh cio hna usih. Lai miphun pakhat cu a Nu pawchung in a hung chuah bak khan, Pa a si ahcun “Salai” a si i, Nu a si ahcun “Mai” a si colh cang.
Salai le Mai kan i bunh a herh khunnak cu Lai miphun hi ramkip ah kan pem hna i, hmunkip ah kan t’hudir cang hna. Cu tik ah Mirang min, Kawl min le miphun dangdang min tampi kan i sak cio cang hna. Cu tikah Laimi kan si maw si lo i theihhngalh a har chin lengmang cang. Tahchunhnak ah Laimi pakhat kha Ramleng a umnak ah a minthang ngai sehlaw Johnny, Steven, Aung Lin, Shwe Thun tibantuk hna sisehlaw aho nih Laimi a si colh tiah kan thei kho ti lai lo. Lai min te aa sak lo caah kan miphun tampi thlau sual khawh an si. Nain hi hnu kum chan tampi zong va kal in miphun dang min zong i sak ko hmanh hna usihlaw kan Nunphung a tlaulonak ding lam pakhat cu Salai le Mai min i bunh cio hi a si. Lai min a ngei hna zong nih Unity lungput he kan i bunh cio a herh bantukin, Lai min a ngei lomi ca lebang ahcun a herhtuk hringhran. Salai Aung Soe, Mai Rose Marry, Salai Robert, Mai Thwe Hnin Phyu, Salai James Smith tibantuk in kan i bunh cio ahcun Chin miphun kan sinak zeitikhmanh ah a tlau ti lai lo. Cucaah Lai Miphun kan him na duh maw? Lai miphun na daw maw? Salai le Mai hi na minhram ah rak hmang ve.
PATHIAN pekmi nunphung kilhkamh usih.
Lai miphun lungrualnak dirpi usih.
Lai National Name le Lai Common Language ser usih.
THE LAIRAM TIMES VOL 1 ISSUE 16
