Lawngtlai ah Excise & Narcotics Minister Dr K. Beichhua nih Nasha Mukt Bharat Abhiyaan 2.0 a hon
The Lairam Times, West Lairam, Lawngtlai, 28 Zing 2022 : Cozah tlai lio nih ram pumhuap rithaisii dohnak kalpi ding “Nasha Mukt Bharat Abhiyaan 2.0” cu nihin ah Government Lawngtlai College Hall ah Mizoram cozah Excise & Narcotics Minister Dr K. Beichhua nih a hon.
Dr K. Beichhua nih kum 2021 ah cozah tlai nih cun, rithaisii doh dingin
Nasha Mukt Bharat Abhiyaan a kalpi kong a chim i, Mizoram chungah rithaisii (drug) karhank – Lunglei, Lawngtlai le Mamit hna ahhin rithaisii dohnak biatak te’n kalpi dingin a chim. Hi District khuapi ahhin Zipeng Chairman nak tangah rithaisii do Committee dirh a si dihnak kong a chim. Committee ahcun official hna hlei ah zaanghleicawi hna le Khrihfabu aiawh hna tel dingin a chim.
Dr K. Beichhua nih Mizoram ah drug a karh ruangah mino hna lakah HIV/AIDS ngei an karh tiah a chim. Hi bantuk chiatnak a chuahpitu rithaisii hi kan dihlak nih kan doh a hau, zapi nih rithaisii zuar kan theih hna ahcun nawlngeitu hna sinah theihternak tuah in rithaisii dohnak rian kan bawmh hna a hau, ram caah riantha kan tuan zong a si fawn tiah a chim.
Lai Autonomous District Council (LADC) Chief Executive Member Pu V. Zirsang nih rithaisii karhnak ah nun a him lo, thilfir le i thahnawnnak a tam khun tiah a chim. LADC ramchung ah mino hna nun hrawk dingin rithaisii zuarthlai hna cu fak pi’n hrem an si lai. A tu in rithaisii kan doh lo ahcun tuhnu kum nga ahcun Mizoram thlanhmun ah Mino hna thlan a khat lai, mino hna nun hrawktu rithaisii hi ram pumhuap nih kan doh a hau tiah a chim.
Hi caan ahhin Lawngtlai Additional Deputy Commissioner Pu James Miahlung nih a hruai i, UPC (NEI) Lawngtlai West District ah District Secretary Rev. Lalsawmliana Sailo nih caanzarh a hman, Zipeng Pu Amol Srivastava nih a rak chuakkho mi cungah lawmhbia a chim. Additional Superintendent of Police Pu C. Lalruatkima hruainak tangah rithaisii tawngtham lo dingin biakamnak pledge chim a si.
Hi caan ahhin Excise & Narcotics Station, Lawngtlai Officer-in-Charge Pu Lalrengpuia nih report a pek i, Sikpar 2019 in Zing 2022 thla tiang Lawngtlai ah rithaisii case register 420 a umnak kong a langhter. Tu dirhmun ah rithaiisi No. 4 nih Lawngtlai a muihmai a chiatter tiah a langhter.
Nihin caan hmannak ahhin LADC EM le MDC hna hlei ah cozah official hna, political party hruaitu hna zaanghleicawi hruaitu hna an i tel.
