Kawl, Lai Ralzaam Kong Ah Aizawl DC Nih Theihternak Thar 11
The Lairam Times, West Lairam, Lawngtlai, 28 Zing 2022 : Aizawl Deputy Commissioner le Chairman, District Task Group on Myanmar Refugees si mi, Dr. Lalhriatzuali Ralte nih cun a tanglei bantukin theihternak cathanh a chuah.
Myanmar ramchung buai ruangah Mizoram ah a rak phanmi ralzaam caah i thithruainak le theihternak Deputy Commissioner, Aizawl District nih a rak chuah cang bantukin theihter thannak. A tanglei ah langhter mi hna hi Khua le Veng kip ah Kawl le Lai ralzaam hna nih zulhding a si lai. Hi theihternak tuahmi hi zulh a si khawhnakhnga Veng/Khua kip i Local/ Village Level Task Group on Myanmar Refugees le Veng/Khuachung NGO hna theihternak.
- Khua/Veng chung ah Kawl, Lai ralzaam rak phan thar hna cu Local/ Village Level Task Group on Myanmar Refugees sinah i theihternak ( report) an tuah hrimhrim ding a si. Task Group nih format tuahpiak in profiling an tuah lai i, Zonal Officer nih hearing a ngeih hnuah Deputy Commissioner’s Office, Aizawl ah identity Card tuah ding a si.
- Aizawl District chungah Relief Camp ah um ding paohpaoh hna cu Deputy Commissioner, Aizawl asiloah a aiawh hna sinah cohlannak an ngeih hmasa lai.
- Kawl, Lai ralzaam hna nih phunglut lo chawlehnak kalpi le Mizoram State chung phung le lam khuatlang phunglam kalh in an khuasak ding a si lo, cun India ram phung le lam an zulh ding a si, an cohlan lo ding a si lo.
- Kawl, Lai ralzaam hna nih anmah duh in dawr tuahnak, chawlehnak an kalpi ding a si lo. Ram phunglam zulh dih ding a si.
- Kawl, Lai ralzaam hna nih hmundang ah an i thial duh asilo ah tintuknak ruangah umnak thial an duh ahcun Relief Camp in-charge (Relief Camp chung um caah) asilo ah an umnak Veng/Khua i Local/Village Level Task Group on Myanmar Refugees sinah an i theihter ( report) lai i, an nih nih DC’s Office, Aizawl ah an report than lai i, Deputy Commissioner asilo ah a aiawh nih siannak / Movement permit a pek khawh.
- Khuadang/ramdang tlung hna nih Deputy Commissioner asilo ah Local/ Village Task Group on Myanmar Refugees asilo ah Camp In-charge asilo ah pakhat khat sinin Movement Permit an ngeih ding a si.
- Myanmar ramchung buainak ruangah Mizoram chungah ralzaam ummi hna nih Ram phunglam hmanlio ‘the Mizoram Land Revenue Act, 2013’ bantukin ram le innhmun cawk le ngeitu sinak an ngei kho lo, ram le innhmun ngeitu hna zong nih phungbuar in ram le innhmun zuar lo ding.
- Myanmar lei in ralzaam hna lakah motor luhpi mi hna nih Local/Village Level Task Group on Myanmar Refugees sinah theihternak an tuah ding a si.
- Myanmar ramchung buainak ruangah Mizoram ummi hna lakah, phung bantukin India/ Mizoram rak lut, phung tangah motor khalhnak nawl International Driving Permit (IDP)/License ngeitu hna dah ti lo nih motor khalhnak nawl an ngei lo.
- Kawl le Lai Mizoram ralzaam hna nih phunglo in Aadhar Card/Voters-ID/Driving License le a dangdang tuahter lo ding.
- Hi i thithruainak le theihternak hi Kawl le Lai hna Mizoram ralzaam hna nih zulh ding le theihter dingin nawl an si, i thithruainak le theihternak zul lo an um ahcun an i tlak ningin hremnak pek an si lai.
