Nithla Țial Ning_ Salai Van Biak Thang

Zeitik dah na chuah tiah an kan hal tikah thongkhat zakua sawmkua kum kua, January ni hra (1999 January 10) tiah kan chim. Cucu kanmah Lai dan tein chimrelning a si. Kum kan chim hmasa i thla le ni nih an zulh.

Laica tialmi le tialning zoh tikah kan chimning in kan țial lo a tam deuh. A cheu nih January 10, 1999 tiin an tial i a cheu nih 10 January, 1999 tiin kan tial. Thla a hmasat chel, ni a hmasat chel a si. Hihi miphun dang hna chimning le tialning deuh an si.

Kum zeizah dah na si cang tiah an kan hal tikah kum hra (kum 10) tiah kan chim. ‘Kum’ timi biafang kha a hmasa ah kan chiah i kan kum a simi a nambat nih a zulh. Zeitik kum ah dah na chuah tiah an kan hal ahcun 1999 kum tiah kan chim i a nambat tu ah ‘kum’ timi biafang nih a zulh.

Lai cazual, thawngthanh ca le mekazin hna zoh tikah Mirang hmanning kan zulh kha hmuh khawh a si. Cu kan zulhning balte aa dang cio. A cheu nih ’10 January 1999′ tiin kan tial i a cheu nih ‘January 10, 1999’ tiin kan tial.

Lai caholh tak a hmunhnak a simi lungdonh le thlanlung cațial zoh tik zongah zulhmi tlaihtleeng a um lo kha a lang. Thlanlung i nithla kan khenhning aa dang cio. A tawinak (1.10.1999 asiloah 1-10-1999 asiloah 1/10/1999) in kan hman bik.

A zeizei a si hmanh ah kanmah nih kan chimrelning a simi 1999 January 10 hi kan hman awk a si. A tawinak i hman kan duh ahcun 1999.1.10 tiin kan tial awk a si. A hmasabik ah kum, a lai ah thla le a donghnak ah ni ti’n tlaihtleng ah chiah khawh ahcun zapi kan i ruang ko hnga.#

THE LAIRAM TIMES VOL 1 ISSUE 22