Ralzaam Authawng Phun Hnih – Markita Mualhlun
Zeimaw pakhatkhat hna a um sual ah tiin inn pawngah ‘Tlung’ (khur) rak cawh cio a si. Tlung ha deuh a comi paoh kan rak hngar hna. Caan a hun rauh deuh tikah a sangsang in ramlak le khua pakhatkhat ah idor chungnak hmunhma rak izoh cio a sihan. Mizaw le tarnu tarpa ca ko ah kan rak zenh khun.
Mi cheu nih, “Kannih cu mizaw he kan si caah ramlak le khuate ah cun kan um kho lai lo” an ti. Mi cheukhat ve nih, “Kannih zong tar he kan si caah kan um kho ve lai lo” an ti. Cheu nolh ve nih, “Kannih zong ngakchia hrumhru he kan si caah kan um kho lai lo dah” an ti ve. Cuti cun Thantlang chuahtak in khuate lei um ding hi kan rak zenh cio. Cucaah Thantlang chuahtak lo dingin kan rak iforh tawn.
Kan um narawraw buin kan inn an khangh, kan minung hawi an thah hna. Cucaah 2021 Sept. 20,21,22 ahhin zapi chuah in kan chuak ti khawh a si. Chuahtak kan duh lo nain kan chuahtak ruangmang. Chuahtak kan siang lo nain kan chuahtak hiamhiam. Mizaw, tarnu tarpa le ngakchia hrumhru he tiin kan chuak i hmun kip ah khua kan sa hna.
Caan karlak ah itlawnkainak le phone in thawngpang ihalnak kan ngei pah tawn. Minung khuasaknak ah a tlamtling dih ti cu a um kho lo nain kan ruahnak nakin kan tlamtling deuh cio ko tiah ka ruah (ka palh sual ahcun ka ngaithiam u). Mizaw, tar le ngakchia he kan si caah kan rak zenh kho tuk. Kan hun zaam taktak tikah cun kan zaam hlan i kan rak zenh tluk khan a hartuk lem lo, kan tlamtling ngai lehlam ko tiah ka ruah.
Kan ruahnak nakin a tlamtlinter deuhtu hna cu: (01) Pathian, (02) Zaamnak khuami dihlak le (03) Bawmchantu dihlak an si. Khuami nih, “Annih cu mizaw he an si caah, annih cu tar he an si caah, annih cu ngakchia hrumhru he an si caah …” tiin siarem deuhnak dingah an kan umter. Pekhenh awk ahami paohpaoh an kan pekhenh. Mi mit hawi zoh hngar lo dingin an kan tuah. Cun ram chung ram leng in bawmtu tampi an um. An pawam lai, an khuasik lai ti an kan phang. A phunphun in an kan bawmh. An kan bawmhnak hi `ial cawk ding le chim cawk ding hmanh a si lo, a tam lengluang.
Cucaah Pathian cung le khuami dihlak cung le bawmchantu, pe`hentu, kutsamhtu cungah kan ilawm tuk, tihi ralzaam authawng phun khatnak a si. Kan ilawmh tluk in lawmhnak bia chim kan thiam lomi ruangah kan ngaithiam u. Khuami dihlak cungah kan ilawm. Bawmchantu dihlak cungah kan ilawm. Bawmhnak tawlreltu dihlak cungah kan ilawm. Pathian nih thluachuah in pe chin lengmang hna she tiah ralzaam nih thla kan in campiak hna.
Tuchan cu Media chan a si. Facebook in atu ah a cangmi kha atu ah hngalh le hmuh colh a si cang. Thantlang ralzaam pawl bawmhnak caah, Thantlang inn kaangmi hna bawmhnak caah timi cu Facebook ah hmuh cio a si. Cun bawmhnak a tingcotu hna nih an tincomi he Facebook ah an lunglawmhnak an langhter tawn. Cucu a kiken bik ah a zaammi hna zong nih Facebook ah an rak hmuh dih ve.
Cu a hmutu ralzaam cheukhat nih, “Kannih zong Thantlang in a zaammi kan si ve ko, bawmhnak kan hmu ve lo ee” an ti tawn. Cucu ralzaam cheukhat authawng a si ve. Naite ah a inn kaangmi hmanh bawmhnak an pek cang hna nain tuanpi ah a kaang cangmi kei vial cu atu tiang an ka pe rih lo, a timi zong an um pah len. Ralzaam ciocio ah, inn kaangmi ciocio ah mi zei bantuk dah an bawmh hna i mi zei bantuk dah an kan bawmh lo, tihi ralzaam authawng phun hnihnak a si.
The Lairam Times Vol I Issue 1
