Kan Țial I Thleng Hlah Seh, Rev. F. Za Thang ( Church Pastor, Olive Baptist Church, Halkha)

Hnipuan ah par aa suai mi le a ṭial phun a duh na, muici (a zawng)o pakhat a sen, a raang, a nak tbk lawng a duh na tiin kan i dang cio.

Nai hrawng Lai thil/thuam hi a ṭial thawitenh an ṭamh, an chap, an thlen deuhdeuh ah aa dawh chin lengmang a ti na, upa deuh lungfim caah cun fih a nung Lai thuam a si lo a ti na kan si. Laimi kan sinak zong miphun dang sining kan i lak deuhdeuh ah khin mit kan kem i huat kan tlai deuhdeuh ve rua ka ti.

Keimah hi Haiphai, Khualsim miphun hmete ka si i Lai (Halkha) holh hi ka cawn chom a si ve. Tang 5 kai ka thawh ah kum 10 hrawng ka si in khua dang ah sianginn ka kai. Kum 12 hrawng aa peh in mah le chuahkehnak holh a hmang lo mi sin ah ka um. Baibal sianginn ka dih in kan khua ah kum 2 lawng rian ka ṭuan i thla ka cam le thawngṭha ka chim ah i titer phun mah khua holh i ziak lo tbk um zong ka hmang lo. Cun, Kum 24 chung holh dang a hmang mi sin ah nihin tiang rian ka ṭuan ṭhan. Holh phun ka thiam luklak mi hi phun 5 a si nain kan khua holh hi chungkhar ah kan hman zungzal caah ka thiam bik mi holh a si. Ka fale he zong miphun dang holh in kan i chawn bal lo.

Nihin Laimi tampi cu vawlei khuaza kip ah kan i ṭhek dih hna. An fim an thiam an rumnak kan i lak khawh mi cu a ṭha tuk nain mah holh tiang philh le chim i harh in midang holh tu thiam le naal deuh cu santlai lo kan si zo a langhnak a si. Mah le holh i zahpi chinchin khi cu holh phun kip a kan petu le sertu Pathian zei rel lo le hruh taktak a si ka ti.

Holh dang veve a hmang mi nu le va i ton tik ah heh tiah i zuam veve i holh i thiampiak a ṭha bik. Nu le pa nih fale sin ah keimah holh thiam seh tiin kap khat ruahnak lawng ngei lo in, fale zong nih nu holh he pa holh he thiam khawh i zuam ding a ṭha bik.

Halkha sianginn kan kai lio ah Zo holh a hmang mi nih Lai holh ṭha tein an chim khawh lo le an holh a pei nawn ah khin kan rak nek hna i a tu ka ruah ah ka ning a zak tuk.

Mi holh Kawl, Mirang tbk kan hman tik ah kan pei cio ti khi a ruah awk kan rak hngal lo. Cu bantukin Laimi (Chin) zong hi a khua in siseh, pengtlang le phun ṭengnge tete he cun kan tam ngai. Mah le mah hi a sang bik le Laimi hrampi ( a tak ) kan si tiah chak le thlang i zohchuknak ngeih tawn mi zong chanthar fanau chan ah dihdonghter zokzok a hau. Midang tu khi va upat zohcho le mi toidor si hi Jesuh cawnpiak mi zong a si.

Yangon tlawnnak ah Falam holh hmang nih Tedim holh dawr a theih ahcun min i hngalh lo zong ah Laimi veve kan si tiah Kawl hmai ah i chawnh ding kan si. An chim tawn mi, “Cenghngia tuu phaw aih chom cu ṭih a nunnak le sahring ei seh hmang a sinak a tlau hlei lo” an ti bang, Laimi kan sinak taktak kan holh, nunphung mertak riangmang in kan ṭial miphun dang sining i thuamh chun zong ah a donghnak ahcun mah le kotho sinak in ṭhen khawh le tlau khawh a si lo. Cucaah, hi careltu vialte nih Laimi sinak kan ṭial i thleng chun in a dongh maw rawt i ningzah kan ton ding nak cun ṭial thleng lo tein Pathian pek mi Lai miphun kan sinak thlau lo, ṭhanpi le kan holh kan ca, nunphung nunpi i zuam cio hna usi tiah kan sawm hna.

The Lairam Times VOL-I ISSUE NO. 5