Israel Bawmh Dingin American Foreign Minister Nih Biahren Tuah

Israel Bawmh Dingin American Foreign Minister Nih Biahren Tuah, Hamas nih a kah hmasami Israel lei ah kan dir ti langhternak caah American Foreign Minister Antony Blinken cu Israel ram Tel Aviv khua ah a kal i, Prime Minister Benjamin Netanyahu he nihin ah tonnak an ngei. American nih cun Israel cu zeitik caan paoh ah kan dirkamh in kan bawmhchanh lai tiah Minister Blinken nih a chim.

Israel nih a ram kilvennak ah thazaang a ngeih ko nain American cu Israel lei ah a dir zungzal ko lai, Hamas lei nih Missile in an kahmi runvennak ding ca telh in Israel cu kan pek lai tiah American nih a fehtermi hriamnam hna zong Israel a phan cang tiah a chim.

Israel ah a thar an dirhmi lakhruak cozah phu le American Foreign Minister hi nihin ah tonnak an ngei. Hamas nih an tlaihmi hna American mi an luatnakhnga le kahdohnak a chuahnak Gaza hmunram ah aa hrengmi kong zongah Minister Blinken nih biahrennak a tuah.

Kahdohnak ruangah American minung telh in minung 1200 nak tlawmlo an nunnak liam. Israel nih lehrulhnak a tuah ve i minung 1300 nak tlawmlo an thi. American Foreign Minister Antony Blinken hi Israel ram in Jordan ram ah a kal lai i, Jordan siangpahrang Abdullah, Palestine hruaitu Mahmoud Abbas hna he tonnak an ngei lai.