Thantlang Kahdohnak Ah CNA, CDF 13 Miphun Caah An Nunnak A Liam
Thantlang Kahdohnak Ah CNA, CDF 13 Miphun Caah An Nunnak A Liam, East Lairam Thantlang nizaan i kahdohnak ah CNA 6 le CDF 7 nih miphun le ram caah an nunnak an pek tiah kan theih.
Hi kahdohnak he pehtlai in CNA/F chimnak nawlngeitu Salai Htet Ni nih cun a tanglei bantukin a chim.
Dohthlennak a kal cuahmah ko, hi nak har zong kan ton rih ko lai. Asinain kan lungthin a zor hrimhrim lo. Kan dihlak in kan tangryal hna lai. Thazaang chuah cio hna usih. Thantlang i kahnak ah CNA 6 le CDF 7 nih an nunnak an pek. Hliamtuar zong an tam. Ralhraang lei nih a thi mi an tam hrimhrim lai ti hi kan i kah ning zoh in a fiang ko.
I kah lio ah Hakha in ralhraang motor a ra mi nih ralhraang hliammi an phurh hna kan hmuh hna, hliammi zong an tam ko, felfai deuh in kan hlat lio a si.
Ralhraang riahbuk pakhat lak cu a fawi lo, riahbuk lai ti ah cun ral sining hrimhrim in kanmah lei zong kan faj lai. Zei thawngpang dek kan theih lai ti rumro ka ruat. Cu bu cun kan ralkap hna kan fak lai hih ti theih bu in ralhraang kuttang ah um duh lo in mahte khuakhan lairelnak kan ngeihnakhnga caah ram le miphun caah ral an doh.
Bia in ramdawt cu a fawi tuk, hriamtlaih cu ngamh a hau, nunthap in thantar i put in ka thih tiang ka doh lai ti lungput he nusal pasal thinlung ngeih lo cun doh ngam ding a si lo. A har ko, hriamtlai in nunthap he vulei cungah zei he hmanh thahchunh awk tha a si lo.
Chinram ah Chin zapi kan mitthli a tla cang. Chungkhar nulepa kan in tuarpi hna kan in ngaihchiat pi hna. Nusaltha pasaltha nan kan hrin piak i ram caah nan hlutmi cungah upatnak kan in pek hna. Nihin kan ngaihchiatnak hi hmailei ah zun caan a phan te lai. Nihin a nungrih mi nih a donghtiang dongcat lo in kan kalpi lai.
Lungrual caan a si, lungrual sawhsawh a ngah lo. A tak ram phanhter usih. Chimrel lawng a ngah lo. Tuahsernak he langhter caan a si. Inn lo a rawk ralkap tampi nih nunnak kan pek. CNA hriam an ngei lo thazaang an ngei lo tiah a rak kan nektu nih nihin ah ramdang hriamnam le vanlawng he a kan rat hnawh , cu bu cun ka ram le ka miphun caah thih ka ngamh ti lungput he kan doh, tiah CNF/A chimnak nawlngeitu Salai Htet Ni nih Global Chinland Club he biaruahnak ah a chim.
