Kanpetlet Peng Ah Tlangrai Le Chungtlik In Minung 20 Leng Nunnak Liam
Kanpetlet Peng Ah Tlangrai Le Chungtlik In Minung 20 Leng Nunnak Liam, East Lairam, Thlanglei Kanpetlet peng khua ralzaam riahbuk ah khuacaan nih chuahpimi zawtnak raifanh, chungtlik tuarmi an tam, thlopnak ding sii-ai an i za lo.
Cucaah kum 2023 thawk in Chiapa thla, thla 6 chung ah ngakchia telh in khuami nunnak liammi hi 20 leng an si tiah zatlang ukhruainak phu in sii-bawi pakhat nih a chim.
” A hramthawk ah cun chungtlik, luakluak, ngakchia nih tangfah ti’n an tuar, hi lio caan ah kan nih hi no 5 hmunhma i kan um lio a si. Ka thlopnak hna hmun ah outbreak a si. Kan sinin nunnak liammi hi ngakchia 3 an si. A ruang cu sii-ai i daih lo ruang ah a si. A thla lawng ngakchia kut ah sii-rawnh le siichunh ding ka tuah khawh lo mi zong a um”.
Kanpetlet peng ah thilri le sii-ai lak ding in ralhraang nih rikhiah in an kham caah, chawva tlamtlin lo chinchap a zawfak nih sii-ai an i za kho hrim lo tiah khuami nih an chim.
” Tulio ah a zawfak ai tam ngaingai, biatak te’n a kan phanh, khua pakhat inn 20 umnak ah a zaw lo te ai um lo, sii-ai ah harsatnak kan tong chap, sii zuar khawh dirhmun zong ah kan dir lo, Gate tan in phurh khawh a si lo, sii cawk ding tangka zong a chambau, phurhnak ding zongah a chambau”.
Kanpetlet peng khua hna ah a zawfak an tam, pehtlaihnak lam a har, cucaah caankhel in thlop khawh a si lo, zawtfah a sau, sii-ai a um lo caah ngakchia le kum upa tam deuh an nunnak a liam tiah minlaghter awk tha lo sii-bawi pakhat nih a chim.
” Tha te’n an sinah kan umpi kho hna lo, zarhkhat ah zanhnih riak, tibantukin kan tuah, cu chap ah fur chinchap tlang ah kai chel, tanglei ah tum chel ti a si caah kanmah he pehtlaihnak zong a har ngai. Cheukhat cu ti awk tha lo in khuapi panh hau dirhmun an dir, sifak santlaih lo cio a si tikah harsatnak cu a tam lengluang”.
Kanpetlet peng kalnak Magway ramthen lei ralhraang gate ahhin khualtlawng mi ralhraang nih tlaihkhihnak an tuah tawn bantukin, pa khualtlawng hi a hlei in an ral khun hna.
Hi gate ahhin sii-ai le eidin phurhnak nawl an pe hna lo, an phurh ah cun an tlaih hna tiah khuami pakhat nih a chim. Kanpetlet peng ahhin khua dihlak 100 leng a um i a milu in thongkul leng an um.
