East Lairam Thawngpang Zei Maw Zat
East Lairam, Matupi peng, Zotung hmunram Hunglei khua ah Biangreithlep 14 khan sumilaam pakhat chung hrawng thli a hraan caah inn 80 chung ah inn 60 leng an rawk tiah Zotung lei mi sinin theih a si.
Nithaizing tiang ruah a sur pah rih, thli a hraang pah rih, thingkiak le thingpur a tam caah khuami umkal an i harh ngai tiah kan theih.
Magway ramthen ah hrambunhmi Chinland Defense Force-Asho hmunpi cu Biangreithlep 14 zaanlei suimilaam 2 hrawng ah thlichia nih a hrawh.
” Inncung cih thli nih a hawh/leh, thilchiahnak tlawmpal an hrawk, a dang thilri paohpaoh thli nih a hraanh chih dih” tiah CDF-Asho tuanvo ngei pakhat nih a chim.
East Lairam, Matupi peng, Phanai khua cu cyclone thlichia ruang ah zapi inn cheu 4 chung ah cheu 3 tluk a rawk.
Phanai khua hi thlichia a hraan lio ah zapi hna cu tlakrawh inn le a thar sakmi inn deuh ah a bu in an i dor hna. Biakinn 3, sianginn 4 le cozah rianṭuantu hna umnak telhin cheu 4 chung ah cheu 3 tluk a rawk.
” Khuami hliamtuar an um lo nain inncung cih tu cu a hawh/leh dih nawn hna. A tu cu thli a dai cang caah mah inn cio kan hlam hna nain remhthan ding ah a fawi ti lo, Matupi khuapi ah inn cungkhuh a dih ti’n thawng kan theih hlei ah tlunkal zong a ngah fawn lo, khuapi luhchuahnak Gate phihkhar a si, ei-din ding kan nei nain a chumhchuannak hmunhma kan ngei ti lo, thli a hraan than sual ah cun harsatnak kan tuar ngai rih lai” tiah khuami pakhat nih a chim.
Matupi khuapi le Phanai khua cu Electric mei a rat ti lo nak zarhkhat hrawng a si cang i, Sola pawl hman deuh an si hna nain thli nih a hraanhpiak dih hna caah harsatnak an tuar ngai tiah theih a si.
East Lairam, Matupi peng Zotung ram Tingsi khua ah Biangreithlep 13 ah thlihraang nih khuami inn 130 lakah Biakinn telh in inn 100 leng a hrawh tiah Tingsi khuami hna sinin theih a si. Tuilaw khua zong thli nih inn 5 a hrawh tiah theih a si.
East Lairam khualipi Hakha, Hakha Thar ah inn 7 le Senthang peng Sakta khua ah nizaan Biangreithlep 14 ah thli nih khuami inn 30 leng a hrawh.
Cun nizaan Biangreithlep 14 thiam ah, Thantlang Khualhrintlang Tlangkhua khuami inn 10 le sii-inn pakhat thli nih a hrawh fawn.
Cun Matupi peng Zotung hmunram Aika, Ruava, Lungkhin, Rezua, Tingsi, Tuilaw le Matupi peng Phanai khua hna ah inn 200 hrawng thli nih a hrawh tiah kan theih.
CDF-MARA Hmunpi Telh In Battalion Pathum Rawk
East Lairam, Matupi peng Mararam Lailenpi khua le kiangkap khua ah Biangreithlep 13,14 zaan ah thli a hraan caah inn lo rawkmi a tam tiah theih a si.
CDF-Mara hmunpi telhin Battalion 1,2,3 an rawk tiah CDF-Mara Battalion 3 sinin theih a si. Battalion 1,2,3 he aa naihnak khua hna zong ah a rawkralmi a tam, lamcung ah thing an i khaan hna caah harnak tampi a um.
East Lairam Kawl ralhraang Minister U Kyaw Ngin nih cun Lailenpi ah inn 117 a rawk tiah a chim.
