Manipur Buainak A Zual Chin, Kuki Miphun MLA Kut An Thlak

Manipur Buainak A Zual Chin, Kuki Miphun MLA Kut An Thlak, Manipur ah tribal le Meitei kar buainak cu a zualhma chin, nilini ah khan Imphal ah BJP tribal MLA Vungzagin Valte cu zapi nih kut an thlak, a hliam a fah caah RIMS panhpi a si.

Pherzawl District Thanlon MLA, Vungzagin Valte hi Kuki miphun a si, BJP cozah hmasa ah Tribal Affairs & Hills Minister a si. Nilini khan Chief Minister N Biren Singh he meeting an ngei i, State Secretariat an kir lei ah Meitei pawl nih kut an thlak.

Manipur ah Non Tribal Meitei miphun Scheduled Tribe (ST) Status pektimhmi duhlo langhter in nithum ni ah All Tribal Student Union Manipur (ATSUM) thithruainak in Hill District 10 ah ‘Tribal Solidarity March’ neih a si, Churanchandpur District Torbung Area ah Tribal le Non-tribal kar ah buainak fakpi a chuak, inn le dawr, biakinn an khangh. Buainak hi Valley Distric lei ah a peh i, State pumhuap ti tluk in a buai.

Army le Assam Rifles ralkap tamngai tualchung buainak hmun ah chiah an si. State cozah zong nih buainak a daihnakhnga caah buainak a tuahtu hna cu kah khawhnak ‘shoot at sight’ order nilini ah a chuak.

Thawngdik lo thlah, boruak tha lo a chuahchin nakhnga lo caah State pum in mobile Internet service an phih, a hnuah broadband service zong phih a si.

Buainak a chuahnak hmun i a ummi hna cu Army le Assam Rifles nih hruai in, a himnak hmun ah an chiah hna, zapi minung 7,500 hrawng cu ralkap hmun le cozah nih hmunkip ah umnak ding a tuaktan piak hna. Churanchandpur le buainak a zualnak hmun ah ralkap nih Flag-march an ngeihmi an pehzulh. Ralkap nih zapi cu biavaivuan zumh lo ding le official cathanh lawng zumh dingin an cah hna.

Tualchung buainak a chuah caah Northeast Frontier Railways zong nih Manipur service an kham. State chung boruak a daih hlan cu Manipur ah tlanglawng luhter a si lai lo tiah NR Railways-a CRRO Sabyasachi De nih a chim tu’n Vanglaini nih a langhter.