Social Media Ah Chin Hrinsor I Pumkhatnak Hrawk Kho Hoih Bia Ah MZP Lungnuam Lo
Social Media Ah Chin Hrinsor I Pumkhatnak Hrawk Kho Hoih Bia Ah MZP Lung Nuam Lo, Nihin ah MZP extended meeting nih cun tulio ah social media lei ah Chin hrinsor i pumkhatnak hrawk kho hoih in thli a hraang mi ah MZP cu a lung a fak ngaingai, Chin hrinsor i pumkhatnak a duhtu hna lung a fah cio lai an zumh fawn.
MZP nih cun ” Chin hrinsor hna hi kan duh ruang ah si lo in thencheu kan si, cozah pathum tangah ram le zapi kan um. Cozah dang cio tang i um bu ah kan i pumkhat khawhnakhnga MZP nih cun a si khawhchung in aa zuam. MZP le Nationalist lungput ngei pumpak hna nih cun ramdang mi hmuh in mi an hmu lo. Chin hrinsor hna nih ramdang mi hmuh in i hmuh lo hi MZP lungput le a rak kalpi mi a si. Chin hrinsor i pumkhat khawhnak le i funfom khawhnak ding lungput ngei cio hna usi ” tiah an ti.
Umnak hmunram phunglam i upat thiam piak ding kong chim in ” Hmunkip ah Chin hrinsor hna nih hin kan unau hna kalphung le i thithruainak hi i upat piak thiam a hau. Hmun dang in kan unau kan tlawn hna tik zongah an phunglam upat piak a hau, cucu Chin hrinsor kan i pumkhat khawhnak dingah lam hmuhsaktu zong a si ve.
MZP nih cun ” Khuachak le Khuthlang in kan Chin hrinsor hawi Mizoram State ah an rak zaam , cozah le zapi nih tha te’n kan conglawmh hna hi lung a hmuih ngai. Ralzaam Mizoram State ah a rak zaammi hna nih Mizoram State phunglam an upat thiam a biapi ngai. Mizoram zapi upat thiam hna seh, cucu unau kan sinak ah a biapi tukmi a si ti hi MZP ruahning a si” an ti.
Chin hrinsor (hnahthlak) i pumkhatnak hrawk kho ding thil cu i sum hraamhraam cio dingin MZP nih cun hmunkip i a ummi Chin hrinsor vialte hna sinah nawlnak an tuah.
Cakilh: Mizo nih cun Laimi cu anmah hrinsor , Zo hrinsor (Hnahthlak) ah khumh an kan duh, sulhnu zoh zawn ah Mizo cu Chin hrinsor (Hnahthlak) an si diam, Chin hrinsor (Hnahthlak) si an cohlan khawh lo ah cun, i pumkhatnak cu an chim lo hmanh a tha deuh. Salai Robert Biakcin ( The Lairam Times, Executive Editor)
