Lt.Col. Pu Kap Cung Nung Țuanbia

Lt.Col. Pu Kap Cung Nung Țuanbia, Lt.Col. Kap Cung Nung( 20th January 1926 – 3rd July 1998) cu 1926 Tangkawng 10 East Chin ramkulh Falam peng, Ngawnngan ram, Zawlpi ramuk Pu Lal Phung le Pi Sa Tin Men hna i an fale lakah upabik a si.

A ngakchiat lio ah Falam peng Lumbang khua ah tangli tiang ca a cawng. Kum 1939 – 1941 tiang Falam sianginn ah a peh i tangruk tiang teinak a hmu.

Cun tangsarih cu kai than dingin timhlamhnak a ngei ko nain a voihnihnak ralpi aa ton caah sianginn kai kho ti lo in a chuahkehnak Zawlpi khua ah a nulepa Lo thlawh a bawm hna.

Kum 1942 ah British cozah nih Falam khua ah Lai miphun ralkap tuan kho dingin ”Western Chin Levies” ti min pe in raltuk cawnnak a tuah, hi ahhin nulepa Lo thlawh bawmmi Lt.Col. Pu Kap Cung Nung cu Lo thlawh cu ngol in British cozah nih onmi “Western Chin Levies” ah a lut.

Lt.Col. Kap Cung Nung cu First Chin Hills Battalion chung ah a um i caanrau lo teah senhnih a hmuh colh. Cun kum 1945 a voihnihnak ralpi a dih ah “ First Burma Rifle Army” ah a lutthan, kum 1948 ah senthum an pek.

Kum 1951 ah “First Burma Rifle Army” in 4th Chin Hills Battalion ah aa țhial, kum 1954 ah Kalay, Tawngphila sang ummi Pu Lian Dim le Pi Thei hna i an fanu Ci Ci he Khrihfa phunglam bantukin chungkhar an dirh.

Kum 1956 ah 4th Chin Hills Battalion” in a rian a kai than, kum 1960 Battalion (25), kum 1962 Battalion 15, dohthlen cozah chan tiang rian a țuan lio ah Monywa Chiarman rian zong a tlaih chih.

Kum 1968 ah Major rian an pek hnu kum 1972 ah Lieutenant General tiang a phan, kum 1973 ah Chin Wit-Te-Ta-Tai cu Chin ramkulh tiah thlen a si hnu kum 1974 in 1978 tiang a hmsabik Chin Council chairman rian an pek.

Amah he rianțuan khat a hawikom hna cu U Soe Myint, Pu He Ling, Pu Son Khan Thang, Pu Chia Uk hna an si. Pu He Ling cu a rianțuan cuahmah lio ah a nunnak a liam caah Mindat peng in Pu Gay Khui Sing cu 1976 ah Pu He Ling aiawh ah an lak.

Lt.Col. Kap Cung Nung cu Chin ramkulh, Council Chairman kum 4 chung a tuan hnu kum 1979 in 1982 tiang Shan ramkulh Tawngkyi le, kum 1982 in 1987 tiang Arakan ramkulh Sittawi hna i rian a țuan hnu kum 1987 ah ralkap in a din/ pension.

Pension a lak hnu kum 1998 June 3 ah a dawttukmi Chin ram le Chin miphun cu tantak in Pa Pathian sinah aa din.

Chin ramkulh Council Chairman a tuanchung ah a țuanmi cheukhat.

1. Chin ramkulh thanchonak caah fur țhal hlan umkal khawhnak caah motor lam le lungphah rian a thawk.
2. Zawngkong lamton in Leidawh- Mualbeem- Khawdar-Saimun- Bochung-Tibual-Rih motor lam tha te’n pem kho dingin a fehter.
3. 1975 Vaupi thla ah Matupi ah tuahmi Hakha-Matupi motor lam onnak caan le kum 1977 Nohawng thla Paletwa khua ah tuahmi kum 100 tlinnak ah a mah pumpak hrimhrim nih onnak a tuah.
4. Chin ramchung ah Chinmi nunnak a hrawkmi rithaisii cinnak vialte a hrawhter khawh dih hna.
5. Falam khua College sianginn a umnakhnga timhtuah hnu minung 30 leng Tutor rian sok kho dingin a tuahpiak hna.
6. Chin ramkulh eidin a chambau nakhnga lo, cinthlaknak, zuatkhalhnak, saram phuntha ramdang in lak khawhnak a tuah.
7. Kum 1975 ah Chongthe khua pawng ah hydroelectric onnak a tuah.
8. Chin zapi khuasak tintuk siarem a si deuhnakhnga motor lam he a naih deuhnakhng ah i thial dingin forhfial hna.
9. Chin ramkulh cu hmuntha/vulei tha a tlawmnak hmun a si caah Kalay, Kabaw hmunram ah i țhial le khuasak dingin thazaang a rak pek.
10. Chin ramkukh, Falam peng ah a ummi Rih hydroelectric cu Chin ramkulh zapi chawva luhnak a um khawhnakhnga aa zuam.
11. British chan ah rak zohmi Chin ramkulh, Falam peng Surbung vanlawng bual cu mithmuh in a tlamtlin nakhnga hmunhma zohnak cu amah pumpak hrimhrim hruainak in an zoh.
12. Kum 1924 Meymyo ah British cozah hna nih Chin tlangholh ah fehtermi Laizo holh cu Chin ramkulh dihlak ah a nun khawhnakhnga caah a tuan.
13. Chin ramkulh, Falam ummi Tipil Khrihfabu Biakinn hmunhma an ngahnakhnga a mah pumpak hrim aa zuam.
14. Kum 1945 ah Sir Lanka ah tuahmi English-Burma Grandi biahrenhnak ah 1st Chin Battalion in Major Kap Cung Nung(KapCong) amah pumpak hrim aa tel.
15. Falam peng Tlangzar khua i Laiva, Thantlang peng lei in motor lam a pemnakhnga a rak i zuam.

Cakilh: Hi a cunglei țuanbia hi Chin TV International nih Kawlca in an țialmi kha aa tlak ningin Laica in lehmi a si. Salai Robert Biakcin