Zoramthar Aa Sem Deng Tiah Rev Dr Zaichawn Hlawndo Nih Chim
Zoramthar Aa Sem Deng Tiah Rev Dr Zaichawn Hlawndo Nih Chim, The Lairam Times – Dated Central Lairam Lawngtlai 2024 Pur 12 : 2024 Pur 12 Lawngtlai Press Club ah Rev Dr. Zaichawn Hlawndo nih Myanmar lei Chin dirhmun, Manipur kan unau dirhmun, Mizoram politic dide cuan in Zoramthar aa sem a hlaat ti lo, tiah a chim. Zoramthar i ser ding cu Pathian nih zeipaoh khua a khaan cia dih cang. Chin hrinsor miphun tengnge Chinfa kan i theihfian dih caan le kan i cohlan dih hnuah Zoramthar a si cang lai, tiah a chim. Miphun tengnge phunphun in kan um ah cun Independent National kan si kho lai lo, tiah a chim.
Rev Dr. Zaichawn Hlawndo nih cun, Chin hrinfa miphun tengnge huaptu Zofa Pathian Biakinn Pi sa dingin timhtuahnak an ngeih kong a chim. Hihi Pathian khuakhan cia mi a si caah Pu Zaichawn Hlawndo Vission a si lo, tiah a chim. Zofa Biakinn cu Zoramthar ta a si lai lo. Chin hrinfa vialte ta a si lai, tiah a chim.
Zofa Pathian Biakinn Pi hi 23809.52 square meter (Bight 17.79) a si lai i, vulei cung Biakinn nganbik St. Peter’s Basilica hi 23000 square meter a si. Zofa Pathian Biakinn Pi hi 809.52 square meter in a ngan deuh lai. Innka pi 12 le inndal 12 a um lai. Innka le inndal ah hin Baibal kongkau zukthai in a langhter lai.
cu hna cu
- Thilser
- Eden
- Noah
- Abraham
- Biaphuang
- Bethlehem
- Zisuh Khrih
- Kalhkehtung (Vailamtah)
- Thawhthannak
- Paul
- Cawnpiaktu/zultu
- Damnak innka le inndal hna an si lai.
Vulei cung biakinn nganbik a si lai. Biakinn chung ah minung thutnak 30,000 hlei ah compound le a chung le a leng ah minung 70,000 tlumnak a si lai. A kauh hi hifeet 177 a si lai. Laamtual kauh hi hifeet 80, a saan hi hifeet 177 a si lai. A saknak ah dih ding hi Sing Thonghra hrawng a si lai. A hmun hi Kanan Phaipui Kanan veng Thenzawl ah a si.
Global Mission Centre a si lai. Khrihfa bu kip nih pumhnak ah an hman khawh lai. Thlarau, Lungthin, Taksa damnak thlacamnak hmun a si lai. Pathian thangthat le sunpar pek i pumhkhawhnak hmun a si lai. Khualtlawng lungthin latu hmun biapi taktak a si lai.
Chingchiah : Hlawndo hi Lai miphun an si
