Mara Cozah Session Ngeihnak Ah Manipur Kong Chim Duh Lo Ruangah Dohtu MDC Nih House Chuaktak

Mara Cozah Session Ngeihnak Ah Manipur Kong Chim Duh Lo Ruangah Dohtu MDC Nih House Chuaktak, 2023 Chiapa 26 Mara Autonomous District Council (MADC) Monsoon Session ah dohtu MDC (MNF le Congress ) nih house an chuahtaak.

Dohtu MDC hna nih Manipur Chin hrinsor tuarpinak chimrelnak ding biatung an chuahpi, Asinain MADC Chairman nih a cohlan lo caah dohtu MDC hna nih House an chuahtaaknak hi a si.

MNF le INC MDC nih cun an recess hall ah media he tonnak ngei in, MNF Legislature Party leader Nahlo Solo nih Manipur ah Chin hrinsor fak pi’n an tuar, inn lo an sung, Biakinn tampi an khangh piak hna. Tihnung tuk in i thahnawnnak an tuar lio ah Mizoram pumpi ah tuarpinak le dirkamhnak langhter a si lio i, kan unau hna tuarpinak chim ding biatung chuahpimi Chairman nih a hnonmi cu a poi kho taktak tiah a chim.

Nahhlo Solo nih cun, Manipur cozah cu BJP, Centre Cozah zong BJP an si caah MADC BJP cozah nih hi biatung hi an duhlonak a zumh kong a chim.

MDC dang zong nih an biatung chimfiannak ngei in ” Manipur kan unau hna tuarpinak kan House i chim cu kan miphun le MADC caah thiltha tukmi a si. Business dang zong hnorsuang lo in Session hi kal pi ruahchan a si lio ah tu bantukin chim khawh a si lo caah Session ah rules le bill an chuahpimi zong ceihpi awktlak i kan ruah lo caah kan chuak” tiah an ti.