Zoh Sawh Caan A Si Ti Lo – Mizoram CM Pu Zoramthanga
Zoh Sawh Caan A Si Ti Lo – Mizoram CM Pu Zoramthanga, Mizoram Chief Minister Pu Zoramthanga nih cun Manipur buainak hi zoh sawh caan a si ti lo. Manipur CM le PM Modi nih a rianrannak in țuanvo la colh hna seh, sualnak a tuahtu cu tlaih si hna seh.
CM Pu Zoramthanga nih cun Manipur sual chimpit thiltuah hi a kiangkap ram ca lawng siloin rampi a mui a chiat ter , dirhmun chia taktak ah a dir tiah Instagram ah a langhter.
” Manipur ah kan unau miphun hawi nu pahnih cung ah tuksumpur nak langhternak video thlah a si mi nih mi lungthin a khoih tuk lawmmam. Video ah kan hmuh taklawng in dohkalhnak hi covo i upat piak lo sual chimpit thiltuah, ningzah awk thil a si mi minung cungah tuksumpur langhternak a si. Manipur buainak daihter ding khuakhan ding hi a za tuk cang, hi khuakhannak a tuah kho tu cu Centre cozah lawng a si”.
” Manipur buainak ah minung tampi nih an nunnak an pek, thisen tamtuk a luang cang. Hliamtuar le nunhimnak kawl in hmunkip vai an tam. Cu lak ahhin ka hrinsor hawi Chin hrinsor tampi an i tel. Kan hrinsor hawi tuarnak cu kan tuarnak a si caah ngoltak awk a tha hrimhrim lo. Buainak daihter khawhnak lam paohpaoh dap in, a rannak in tuaktan a hau cang”.
” A ran khawhchung in remdaihnak lam zulh hi a tha, cucaah Manipur Chief Minister N. Biren Singh le Prime Minister Narendra Modi hna zong nih a rianrannak in tuanvolaknak ngei hram hna seh, cun sualnak tuahtu hna tlaih i, phunglam bantukin hremnak pek si hna seh ” tiah Mizoram Chief Minister Pu Zoramthanga nih a lungduh a chim.