East Lairam Mizapi Nunhimnak Thinphang A Si Caah Mizoram Ah Ramdaih Hlan Lo Um Rih Ding A Tha
East Lairam Mizapi Nunhimnak Thinphang A Si Caah Mizoram Ah Ramdaih Hlan Lo Um Rih Ding A Tha, East Lairam ah Kawl ralhraang nih vanlawng in bomb a thlak lengmang caah le mizapi cu hraamhraam in an tlaih hna i, an thah lengmang hna caah zapi nun a him hrim lo caah nunhimnak caah a daihnak Mizoram lei ah East Lairam le Myanmar ram daih hlan cu um rih ding in ICA in Assistant Director Van Sui Sang nih forhfialnak a tuah.
Ralhraang nih vanlawng in kahdohnak a tuah lengmang caah East Lairam chung kumtling lo ngakchia telh in mizapi 100 leng an nunnak a liam. Minung 200 leng nih hliam an tuar tiah ICA nih an thanh ning in theih a si.
” Zeitluk in har fe nan tuar zong ah, a si khawhchung, a himnak hmun phanh ding a biapi ngai i, Mizoram lei ah um ding zong a tha ko. Zeiruangah ti ah cun ramchung ah thil pakhatkhat a can tikah tlamtlin lo nak tampi ton a si lai. Tlamtlin lo nak zong ai khat cio lai lo, Mizoram ah cun nunnak caah thinphan awk ngai a si lo. Ramchung ah minung thutdirnak a tlamtlin lo hlei ah nunnak caah suimilaam 24 chung thinphang ngai a si ko. Zeitik caan ahdah kan umnak hi vanlawng in an rak kah lai, zeitik caan ah dah hraamhraam in an kan tlaih lai tiah nunnak caah thinphan awk a si lo mi le eidin ah lungretheih awk a um lo mi Mizoram ah i dor ding kan duh piak hna ”tiah ICA Assistant Director Salai Van Sui Sang nih Ayeayerwaddy Times ah a chim.
East Lairam ah Chin Miphun ralkap fonh hna le ralhraang kar kahdohnak fah lei a panh chin lengmang caah ralhraang nih hlannak in vanlawng in kahdohnak fak a tuah khawh tiah zapi ralkap sinin theih a si.
East Lairam chung ah raifanh zawtnak a tam ngai, zapi i thlopnak caah sii-ai a chambau tuk hringhran. Sii-ai, hruk-aih eidin a pit lengmang, ralhraang nih hriamngan in an duhnak hmun paoh ah an kah, hriamhme an kah caah hliamtuar le nunnak liam zong an tam, nuhrin covo buarnak zong East Lairam ah zapi nih tuar a si.
” Mizoram ralzaam nih tampi harnak an ton, mah le hmunram cio kir an duh cio, a hlei in kum upa hna, bawmhchanhnak zong an ngah lo, rian zong a har, cucaah mahle hmunram a him lo bu ah kir an duh” tiah Ralzaam Zohkhenhnak Phu in hruaitu pakhat nih a chim.
Ralhraang nih vanlawng in kahdohnak a tuah hlan ah khuami hraamhraam in an tlaih hna i, an thah hna, khua luh/chuahnak an khar, zalonak ri an khiah, ralhmai ser tikah zapi inn an khaangh, Hriamngan hriamhme kahthlorh kahnak ruangah kum 2021 thawk khan East Laimi minung thong sawmruk (60000) leng ramchung ramleng ah ralzaam in an um hna.
