Mizoram Cozah Nih Manipur Buainak Zohsawh Tim Lo – Pu Zoramthanga, CM Mizoram
Mizoram Cozah Nih Manipur Buainak Zohsawh Tim Lo – Pu Zoramthanga, CM Mizoram, Manipur ah miphun hawi nih buainak an tonmi kongkau ah Mizoram Chief Minister Pu Zoramthanga nih remnak le daihnak a um khawhnakhnga a si khawhchung in zuam aa timhnak kong a chim.
Chief Minister Pu Zoramthanga nih Union Home Minister Amit Shah he sau ngai an i chawnhnak kong a chim i, sualnak ngeilo le unau tampi nih harnak an ton hi a poi kan ti taktak, a si khawhchung in remnak le daihnak a um khawhnakhnga Central Armed Police Forces zong chiah chap a timhnak kong Union Home Minister nih a ka chimh tiah a ti.
Nithaizing ah Manipur Chief Minister N Biren Singh sinah telephone in sau ngai kan i chawn, Manipur dirhmun le an buainak kongkau silhnalh a si khawhnakhnga kong kan chim. Cun Manipur CM zong nih chaklei CM hna lakah upabik ka si ve caah remnak a um khawhnakhnga tuanvo lak dingin a ka ruahchan tiah a langhter.
Manipur CM Pu Biren he kan i chawnhnak nih theipartha a chuah kai ruahchan, sualnak ngeilo le unau hna himdam in an um khawhnakhnga dingah Joint Press Statement tuah kan i tim.
Mizoram cozah zong nih hi buainak hi a zoh sawhsawh lai lo, Home Minister le Home Commissioner thithruainak tangah zei dirhmun paoh phan seh, kan mi le sa him khawhnak ding in rianțuan dan ding hna le zohkhenh cianak ding meeting nei ding in ka theihter dih cang hna, tiah a chim.
