ZORO Nih Chin Hrinsor Vialte Le Mizoram Zapi Sinah Nawlnak Tuah
ZORO Nih Chin Hrinsor Vialte Le Mizoram Zapi Sinah Nawlnak Tuah, 2023 Vaupi 25 chun suimilaam 12:00ah ZORO General Headquarters hna cu ZORO Office ah executive meeting an nei , meeting hi Pu R. Sangkawia, President nih a hruai. Meeting ah Chin hrinsor i pumkhatnak ngan ngeih kongkau hna, Manipur State ah Chin hrinsor harsatnak tongmi hna kongkau le Chin hrinsor boruak kong an caih.
Meeting ah cun, Manipur State chung Chin hrinsor hna harsatnak tong in, Khrihfa hna Pathian Biakinn tiang hrawhpiak an si cu lung a tha hrim lo, Chin hrinsor hna cungah hi bantuk hi cu phan hraam ti hlah seh ti kan duh, hi bantuk thiltuah hi kan dohkalh fawn, ZORO cu Chin hrinsor hna caah a dir, Chin hrinsor hna nih harsatnak an ton ah cun an harsatnak kongkau ah a si khawhchung in tuanvo aa khinh peng lai.
Zo-Reunification Organisation (ZORO) cu vulei cung hmunkip um Chin hrinsor i pumkhat in kan um khawhnakhnga, kan i funtom khawhnakhnga, lungrual in kan um khawhnakhnga, Chin hrinsor hna hmunkhat ah kan um khawhnakhnga aa zuammi a si. Tulio Social Media kip Facebook, Whatapp, Instagram, Youtube lei ah Chin hrinsor i lungrualnak le i pumkhatnak a tha lo lei hoih in bia le holh a tam ngaingai, hihi a poi ngaingai. ZORO nih Chin hrinsor i pumkhatnak le i lungrualnak hrawk kho tu holh dawhlo hnang ti lo dingin hmunkip i a ummi Chin hrinsor vialte kan in nawl hna.
Chin hrinsor hna hi hmunkip ah kan um i, cozah dangdang tangah kan um, kan umnak cozah kalning zong aa khat cio lo. ZORO nih cun Chin hrinsor hi ramkhat ah kan um khawhnakhnga United Nations Organisation (UNO) tiang hma a rak lak cang nain a hlawhtlinnak kan hmu kho lo, Chin hrinsor hna hi lairelnak pakhat tangah kan um khawh hlan cu mah le umnak cozah phung le lam zulh a hau, kan umnak cozah phung le lam thei in upat piak, lungrualnak nih i pumkhatnak a chuahpi lai. Chin hrinsor hna hi hmunkip ah um hmanh usilaw kan sinak a tlau hlei lo, holh aa khat lo, kan umnak phung le lam aa khah lo ruangah unau kan sinak cu a tlau lo, Pathian khuakhan cia thisa tlai unau kan si hi thei peng dingin Mizoram zapi a thar in kan in nawl than hna” tiah cathanh an chuah.
Cakilh: Chin/Laimi cu Zo hrinsor(Hnahthlak) kan si lo i, hmailei zong ah kan si fawn lai lo caah, Zo hrinsor (Hnahthlak) biafang ah Chin hrinsor(Hnahthlak) ka hmannak a si. Chin hrinsor i an i pom khawh lo cun, i pumkhatnak cu a fawi lai lo dafawh – Salai Robert Biakcin (The Lairam Times, Executive Editor)
