Chin Association of Maryland Nih American Tuanvo Ngeitu Tonnak Ngei
Chin Association of Maryland Nih American Tuanvo Ngeitu Tonnak Ngei, East Lairam, Thantlang peng ah a luancia mi zarhchung ralhraang nih vanlei in an kah ruangah nunnak liammi, Biakinn rawk, ralzaam mi hna dirhmun he pehtlai in ralhraang cu fak pi’n hmalakpiak dingin Chin Association of Maryland nih American Foreign Ministry tuanvo ngeitu nithumni ah an ton.
Thantlang peng Khuafo khua cu ralhraang nih Vaute 30 ah vanlei in an kah caah khuami 9 an nunnak a liam, 11 hliam an tuar, inn 18 aa rawk i, Biakinn 2 zong aa rawk ti’n mithmu tu hna chimmi i chirchan in (CAM- Chin Association of Maryland) nih an thanh.
Ralhraang nih tu bantuk thil an tuahmi he pehtlai in fak pi’n hmalak piaknak ngeih piak ding in CAM Director Pu Zo Tum Hmung le Khuafo khuami Pastor Aron Tawk Al hna nih vulei cung Biaknak zalonnak he pehtlai in American President le Foreign Affairs Minister ruahnak petu Rashad Hussain cu American Foreign Affairs Ministry ah tonnak an ngeihnak kong Pu Zo Tum Hmung nih VOA ah a chim.
” Kan va tonnak a ruangbik cu U.S cozah kan va nawl, East Lairam ah ralhraang nih bomb an thlakmi ngol ding, bawmchanh ding pakhat kan hal. Ralhraang nih bomb a thlak, kah ruang ah minung nunnak liammi ah U.S cozah nih fak pi’n dohkalh dingin kan nawl. A dang pakhat cu tu bantukin minung lungthin keng lo in thahnawnnak tuah in vanlei in kahdohnak a tuahtu tuanvo ngeitubik Major General Than Htey cu U.S cozah nih hmalak piak ding kan duh. Tu bantukin pehzulh in kahdoh ruangah kan miphun hawi tampi an zaam, tu bantuk kan miphun hawi a zaammi hna hi minung hawi zawnruahnak he bawmchanh dingin kan hal, tu bantuk nawlnak cungah Biaknak lei zalonnak ruahnak petu Rashad Hussain nih tuanvo ngeitu hna sinah a chuahpi lai tiah Pu Zo Tum Hmung nih a chim”.
” Biatak tein a kan ngaih piak, a lunglut ngai, a sinain kan nih kan i ruahchanmi cu amah hrim nih minung lungthin kenglo thiltuah fak pi’n dohkalh, cu bantuk thawngthanhnak a chuahnakhnga kan i ruahchan”.
East Lairam telh in Sagaing ramthen ah ralhraang nih hmunhma thianhnak an tuah, khuami India ramri ah an zaam. Thantlang peng ralzaam caah minung hawi zawnruahnak he bawmchanhnak a um khawhnakhnga American cozah nih a theih i a tawlrelnakhnga zong Pu Zo Tum Hmung nih a chim.
“Ramchung in bawmchanhmi sul le lam ruangah East Lairam phanhpi khawh a har, cucaah India-Mizoram in ramri tan in bawmchanh ding kan duh. Cu bantuk a si khawh ah cun American cozah nih India cozah a naihniam deuh a hau. Tu tiang ah cu bantuk dot a phan rih lo. East Lairam lawng a si lo. Sagaing lei zong aa tel. Mgaway lei phanh ding zong kan theih. Cucaah U.S cozah nih ralzaam bawmhnak ding caah India cozah fak deuh in a naihniam deuh a hau”.
UN nih ralzaam bawmh khawhnak dingah India cozah hnatlakpinak a herh tiah a chim nain India Central cozah zei ti’n dah a lungput a si timi ah Dr Tin Shwe nih a tanglei bantukin a hmuh ning a chim.
” India tulio cozah nih Myanmar cung i a lungput cu ralhraang nih nawlngeihnak an laktimh thawk in lungrawk ngaimi phunglam ah an dir. Mizoram ah Mizoram cozah cu Myanmar lei in Kawl le Lai caah inntek tha an si caah an cungah kan i lawmtuk. Asinain Central cozah tu cu chimpit bak. A luancia zarhhnih hrawng ah Mizoram in chaklei Manipur ramkulh ah Myanmar ralzaam minung 5000 hrawng umnak ding riahbuk pakhat a cohlan. Cu zong cu ramkulh lungtlinnak a si. Cu ahcun UNHCR hna a dangdang phu zong India Central cozah nih lungtlinpi lo cun tuah a ngah lo. India cozah cu UNHCR ah minthu mi a si lo. Keimah ka hmuh ning ah India Central cozah nih zawnruahnak phunglam a ngeilo in ka hmuh”.
2021 Nohawng thla ah ralhraang nih nawlngeihnak lak an timh thawk in India ramri ah a zaammi CDM tuahmi le ralzaam 52000 hrawng an um lai tiah zumh a si.
