Kan Rum Lo Nain Kan I Nuam Ko ” Ca Rak Tarnak Thantlang
”Kan Rum Lo Nain Kan I Nuam Ko ” Ca Rak Tarnak Thantlang, Kan rum lo nain kan i nuam kotiah hauka ah ca rak tarnak khua Thantlang cu hlan ah cun dai ziziam te le khual zong ningngam ngai in rak tlawnlennak cu ralhraang nih nawlngeihnak lak an timh hnuah kahdohnak a fak i ralhraang nih vanlawng in bomb an thlak, inn an duah hlei ah biaknak hruaitu hna an thah hnanak kumhnih hrawng a hung si cang.
Cu lawng siloin Thantlang khua kiangkap hna ah ralhraang nih vanlei in bomb a thlak caah khuami hliamtuar le nunnak liam hna an um.
Vaute 30 zinglei ah Thantlang in meng 5 hrawng aa hlatnak Khuafo khua ah vanlawng 2 in bomb an thlak caah kum 9 ngakchia 2 hna he minung 8 an nunnak a liam, hliamtuar zong an um i, inn lo rawk zong a um.
Ralhraang nih kahdohnak a um lo nak ah khuami tinhciammam te’n a kah hna tiah Chin National Fornt in chimnak nawlngeitu Salai Htet Ni nih RFA ah a chim.
” A tu bomb an thlaknak hmun hi CNA zong an um lo, CDF zong an um lo, zapi umnak hmun a si, ralhraang ni ah Min Aung Hliang biachimnak ah fak pi’n hma kan lak lai tiah a ti i, Chin miphun an thinphang hna seh tih hna seh tiah a tuahmi a si. Ralhraang hi ralhraang taktak ralhraang hriamtlai an si”.
Khuafo khua ah zeiruangah bomb an thlaknak kong ralhraang nih thanhmi zeihmanh a um rih lo, Chin ramkulh ralhraang biachimnak nawlngeitu U Than Nyin cu pehtlaih a si nain lehnak a tuah duh hna lo.
Thantlang khuachung ah kum 2021 Zing 19 thawk in ralhraang le zapi ralkap kahdohnak a chuah hnu inn 19 kangmi hmih dingin aa thawhmi Pastor Cung Biak Hum cu ralhraang nih an thah.
2021 Tho 19 ah Thantlang Khrihfa Biakinn le inn 164 nak tlawm lo ralhraang nih an khaangh.
Kahdohnak ruangah Thantlang khuasa mi a thong leng nih khua an chuahtak i, kiangkap khua le India ram, Mizoram hna ah zaam a si.
Thantlang khua cu inn lo rawkmi a tam hnu ko zongah nitin bomb thawng meithal thawng a dai hraw lo.
” Thantlang dirhmun cu zapi um lo hnu ahcun king riangmang te’n a um, ning a tih thling a kik, asinain meithal thawng le bomb thawng nih a tuam, nawlngeihnak laktimh si hlan ah cun a thangcho ngaimi khua a si nain, tu ah cun dai ziziam te’n a ummi hmunram a si cang”.
2022 Pur 9 ah kum 60 leng si cangmi Thantlang Tipil Khrihfabu Biakinn cu ralhraang nih an khangh hnu cun tu le tu a khua dihlak ngawt in an khangh.
2023 Nohawng ah Thantlang khuachung video in thlatu zapi ralkap pakhat nih inn 2500 chungah cheuthum cheuhnih cu a kaang cang tiah RFA ah a chim.
” A bikin khuachung cheuthum ah cheuhnih a kaang cang, a taangmi inn cu ralhraang nih an baoh, an duhmi thil, chiti telh in eidin ding hna an fir, cu bantuk inn baoh piakmi a tam, inn kalong pi in a tang zeihmanh a um lo”.
”Ram that lio ah Thantlang cu a minthang, inn lo zong a tha, mi chawnhbiaknak zong ah a nuam, Biaknak lei zong aa hliphlau, chawlehnak ah lamkam ah dawr phunphun, lakphak dawr tbk nuam ngai in a rak um, asinain tu ah cun a dihlak ngawt in a ciam ruangmang, lungthin a fak i ngaih a chia hringhran ko”.
Nawlngeihnak laktimh a si hnu kum 2 chungah Thantlang khua ah Chin National Front hmunpi telh in ralhraang nih vanlei in bomb 140 leng a tlak tiah CNF nih an chim.
Ralhraang nih 2023 Tangkawng in Vaute tiang Falam riahbuk, Hakha riahbuk le Thantlang riahbuk in Thantlang khuachung cu hriamngan in uite ekfer bang dai thiam lo in an kah.
Zapi hmuitinh in a kaptu Biaknak inn a kaangtu ralhraang hi ralphung a buarmu an si tiah CHRO in Salai Mang Hre Lian nih a chim.
” Zapi hmuitinh in kah a ngah lo, Biakinn, Biaknak lei inn, sii-inn, sianginn hrawh a ngah hrimhrim lo, ral phunglam ah cun, vulei cung phunglam ning ah, Thantlang kan zoh tikah ralhraang nih zapi an kah hna, ralhraang nih ralphung an theih kk bu in an buarnak cu Thantlang khua nih fianghlang in a langhter”.
Chin zatlang bu cazin ning in Chin ramkulh in a zaami ralhraang thong sawmruk hrawng an si i, India ram, Mizoram, Manipur ah a zaammi thong sawmnga hrawng an si.
CAI nih Vaute 2 i a thanhmi ah Chin ramkulh ah zapi ralkap telh in minung 400 hrawng an nunnak a liam i, inn 4300 leng a kaang.
