CYLA Cathanh
CYLA Cathanh, 2023 Vaute 22 i India le Myanmar ramri ah misual kut tong in a thimi – Lungpher South i kan YLA chungtel member hawi Pu B. Lalthafamkim le New Siaha i khuasami Pi Biaksui le Bablu, MRHG hna thihnak hi Central Young Lai Association nih cun poi kan ti i, vanchiat thihlohnak a tongmi chungkhar vialte kan lungthin tak te in kan in tuarpi hna. Hi lainawnnak i ai telmoihmi vialte a hlei in kan mawhchiat hna pin ah Mizoram kokek minung a simi nih hibantuk thil duhnung lo bik vanchiatnak an ton hi kan lung a fak hringhran i, hmailei caan ah hi bantuk thil hi cang (tlung) ti hrim hlah seh kan ti.
Hi lainawnnak tuksapur i ai telmoihmi hlathlai le tlaihkhih kong ah a si khawhchung in Central YLA nih cun hma a lak colh i. Lainawngtu hna hi tlaihkhih an si zau khawh nakhnga a herhning i hmalaknak pehzulh peng ding in Cozah lei nawlngeitu hna zong hnabeisei an si. Cupin ah, hi lainawnnak kongkau ahhin nawlngeitu hna le Central YLA pawl hmalaknak zong an kan hnathlakpi i a herhning in an kan ṭuanpi cio ding in Mizoram chungum mizapi le Myanmar ramchung i ummi kan unau vialte kan in hnabeisei hna. A bik in Myanmar ram buainak i dohthlennak a tuahtu pawl – CDM, CDF, PDF, CNA etc., hna zong hi lainawnnak kongkau ah, lainawngtu hna le ai telmoihmi hna tlaikhih an si zau khawh nakhnga a herhning in hma rak kan lakpi ve cio ding in kan in nawl fawn hna. Myanmar buainak ruang i rak ralzaammi, an kan fuhpanhtu kan unau pawl bawmhchanh kongkau ah kan si khawhchung in kan i zuam ve cuahmah ko lio ah hibantuk in lehrul cham kan si hi Central YLA nih cun kan theithiam lo ngai i. Hibantuk hi kan rak ṭihphan cia mi le, tong lo ding in kan duh tukmi a si ko lio ah, unau kan sinak le kan i pehtlaihnak thazaang zong derter kho thil kan tonmi hi poi kan ti hringhran. Hi bantuk thil a can ti lo nakhnga mah ralkap cio le khuami hna zong rak forhfial ding in le rak chimhrin hna ding in kan in nawl fawn hna i, Central YLA zong nih kan ramchung i rak i dormi hna zohkhenhnak kongkau ah kan tha i rengh chinchin ding in le a hlan
nak i fak in ri khampiak an si cang naklai timhlamhnak zong a kalpi colh cuahmah fawn.
