Zathang Phun Thawhkehnak

Zathang phun thawhkeh ning hi a fiang lo ngai. Laimi Lairam an hung phakka hrawngah hin Zathang phun hi rak um rih hna hlah sehlaw a dawh. Pu Za Thang thawkin a tefa hna nih an pa min kha an phun min ah i sak hna hna sehlaw a dawh. Za Thang hi Phailenzawl an tlak hnu minung a si. Za Thang cu Hluan Sang fa a si i, Hluan Sang cu Tio Hlei nau a si. Tio Hlei le Hluan Sang an pa hi aho a si ti cu hngalh a si lo nain Phailenzawl i an rak um lio ah an uktu bawi a si.

Micheu nih an chimnak ah cun, Sai Kham le Hno Ngan nih Cin Zah, Za Thang, Hlawn Ching le Kheng Lawt an hrin hna i cu hna fale nih an pale min kha an phun min ah an i lak cio tiah an ti. Asinain hihi cu si dawh a si lo. Zeitiah Hno Ngan cu Hlawn Ching phun fanu a si i, Thlantlang an tlak hnu ah Halkha ah va a ngei mi si. Thlantlang khua ah a ttale a tlawng tawn hna i, Thlantlang langhnak bo in a kui (a vui) tawn an ti. Cuti a kuinak hmun cu “Kuihhmun” an ti i nihin tiangin Kuihhmun an ti lan- Hno Ngan kuihnak bo tinak a si. Vankham chuk i Thlantlang langhnak bo i atu motor lamthlang khuami a si caah, Thlantlang cu Halkha an tlak kum 50 hnu ah tlakmi khua a si caah Cin Zah, Za Thang, Hlawn Ching le Kheng Lawt hringtu cu a si kho mi a si lo.

Tio Hlei nau ah Hluan Sang a si i, Hluan Sang nih Za Thang (Zaa Thang) a hrin. Za Thang thawkin a tefa hna cu Zathang phun ti an si. Tio Hlei phun cu nihin tiang an um ve caah Tio Hlei a fale nih an pa min kha an phun min ah i lak ve hna sehlaw a dawh ko. Za Thang pa Hluan Sang le Tio Hlei an pa tu hi zei phun a si hngalh a si lo. Micheu nih cun Tio Hlei le Hluan Sang an pa hi Hlawn Ching a si an ti, asinain hngalh fiannak ngaingai a um lo. Hluan Sang nih a u Tio Hlei a thah caah Tio Hlei tefa le Hluan Sang tefa hna cu an i rem ti lo i, Hluan Sang fate nih an phun chuah tak in an pa min hi an phun min ah i lak hna sehlaw a dawh ngai.

Zathang phun hi Khuk Hnin le Thang Ding hlanah hin cun minthang le min ngei zong an rak si lem rua lo. Laimi cu phun khat le phun khat, khua khat le khua khat an rak i do tawn i, cu lio zongah cun hruaitu le mihumhak kho an rak si lo. Cinzah le Khenglawt tu hi a hlanah cun mitthawng le mingei deuh an rak si. Phailenzawl i khua an rak sak lio zongah cun Cinzah hi mitthawng deuh an rak si caah an khua hmanh cu “Cinzah Khuangcawi Hmun” tiah an rak ti.

Falam Nunphung komiti nih Lailun cauk an ttialmi ah cun, “Halkha Thlantlang Zotlang i an rak um lio ahhin miphun phun hra an rak um i, cu hna cu: Kingbawl, Khenglawt, Darkhuah, Thlaceu, Cinzah, Lailung, Hranglung, Nguntual, Zathang le Vaingam an si,” tiah an ttial. Hihi a dik lo mi a si. Darkhuah, Nguntual, Hranglung, Vaingam phun hna hi Zathang fale an si i, Phailenzawl an tlak hnu ah Za Thang nih a hrinmi hna an si. Lailun ah cun Zathang a chuak rih lo. Hakha pupa nih an chimnak ah cun Phailenzawl an tlak cu ahhin miphun (hrinphun) phun 9 an rak si an ti. Cu phun 9 hna cu Phailenzawl a tla hmasatu an si i, cu hna cu: Cinzah, Hlawnching, Khenglawt, Kingbawl, Mualhlun, Tinhlawng, Zinhlawng Thihlum, Tio Hlei le Thlaceu chung an si.

Phialenzawl i caan sau nawn an um hnu ahhin, Tio Hlei hi mitthawng a hung si i a rak uk hna. A naupa Hluan Sang nih a u pa uknak cu a cuh i a rak thah caah u le nau an rak i hlonh i, Tio Hlei hrinthlak cu nihin tiang Tio Hlei phun an si ko nain Hluan Sang hrinthlak hna cu Tio Hlei phun an i ti duh ti lo i, Hluan Sang nih Zathang a hun hrin i, Zathang nih Za Biak, Dar Khuah, Ngun Tual, Hrang Lung, le Vai Ngam a hun hrin hna tikah, an pa min kha an phun minah an i lak i, cu thawk cun Zathang phun an si lannak cu a si. Pehthan Ding

LAI MIPHUN THAWHKEHNAK TUANBIA-PU CHAWN KIO
THE LAIRAM TIMES