Mi theih tuk lo mi “We Are The World” hla chuah ning
Mi theih tuk lo mi “We Are The World” hla chuah ning, Tulio maivan chungah a lar ngaimi le uar ngaimi Chinlung Chuak Artist cover timi “We Are The World” hla cu ni 20 hrawngah 1 million leng nih an zoh cang.
“We Are The World” hla cu Michael Jackson le Lionel Richie phuahmi a si i, hi hla a rak chuahning cu hitihin a si.
1983 ah Ethiopia ram ah paam a rak tlung i kum 3 chungah harsatnak, damlonak le rawl-ei-ding ngei lo in minung 1.2 million hrawng an nunnak a rak liam.
Khuasak tintuknak ruat in inn le lo chuahtakmi (internally displaced) minung 2.5 million an um i, rampi chuahtakmi (refugees) minung 400,000 um i, ngakṭah ngakchia 200,000 hrawng an um.
Cu hna bawmhnak dingah hlasak/phuahthiam Bob Geldof le Midge Ure nih 1984 kum ah “Do They Know It`s Christmas” timi hla an phuah i hlasakthiam U2, Sting, Duran Duran, George Michael hna telhin Britist le Irish ram hlasakthiam 37 hna nih an sak. Cu Group cu “Band Aid” tiah an pek i an hlawhtling ngai.
Band Aid nih 1984 Dipa ah “Do They Know It`s Christmas” hla an chuah hnu raulo teah Musician le social activist a si mi Harry Belafonte in American hlasakthiam pawl nih Ethiopia miharsa bawmhnak an tuah khawh ve lai ti zumhnak a neih ruangah Fundraiser/Tv producer Ken Kragen sawm in hlasakthiam tampi chawn in hlaphuahtu dingah Michael Jackson le Lionel Richie an khinh hna.
Cu hmalaknak cu United Support of Artists for Africa (USA for Africa) tiah min pek a si i, nihin tiang a duai hrim lo mi “We are the World” timi hla a hung chuak
Recording tuahnak hi 1985 Tangkawng 28, ah A&M Recording Studios, Hollywood ah tuah a si i hla tlangzarhnak cu 1985 Vaute 7 ah an ngei.
“We Are the World” tlangzarh hnu, thla 4 chungah USA for Africa in $ 10.8 million (tulio $27 million) hrawng tangka an hmuh. Cucun Ethiopia harsa bawmhnak ding cu zapi thawhmi le a dangdang in le US ramchung hla zuarnak in bawmhmi a si.
R&B singles chart, Hot Adult Contemporary Tracks chart, Billboard Hot 100 hna ah top 1 dirhmun in caan zeimawzat a um i Grammy Awards, MTV Video Music Awards, People’s Choise awards ti hna telh in phu dangdang hna sinah laksawng tampi an dong.
US ramchung lawng siloin vuleipi huap in a lar i, miharsa bawmhnak, chiat tong rampi dirhthannak tbk fund kawlnak ah mitampi nih an sak mi cu Chin hrinsor Lai le Mizo nih sak ve a si.
“We Are The World” fun fact ……
Hla an thlah hmasabik ah video intro tuahtu Jane Fonda nih singer 45 an i tel a ti nain a tak ahcun 43 lawng an si. Record an tuah lio ah hla fang kongkau ah i alnak a um i country singer Waylon Jennings nih a dinhtak. Hlasakthiam nunnak liam cangmi Prince zong sawm a si nain record hnubik zaan ah innchung lut duh lo in a kir than.
Minthang tampi i fonh dingmi a si caah hmuhtonnak ngei cangmi “Do They Know It`s Christmas” tawlreltu Bob Geldof cu hruaitu pakhat dirhmun ah telhve a si i amah nih a tawlrel.
Hlasa ding anmah le khap cio in minthang cio an si ruangah uanawktlak lungput an ngei cio lai ti cu theih a si. Cucaah buainak le entainak um lo ding ruahchan in A&M Recording Studios innka luhnak ah “ Puarthaunak na lungput hika ah chia ta” tiah ca an tar.
Nunnak liamcangmi hlasakthiam Prince nih cu catar a hmuh le cangka a lungtling lo i a kir than tiah bia a leng nain chungkhat hna nih cun “a bodyguard thongtla tlanh dingin a kal ruangah aa tel lo mi a si ” an ti ve.
We are the World Tv version hi an chuah hmasabik ah minute 53 a sau i, a dang an telhmi he suimilaam pakhat nak in a sau.
***Chorus i
“There’s a choice we’re making
We’re saving our own lives”
timi cu …..
“There’s a chance we’re taking,
we’re taking our own lives” … ti`n phuah mi a si nan “suicide” ti duhchannak a lawh caah recording an luh hmasabik, 1985 Tangkawng 22 ah hlafang an thlen than.
Zohchih – FOM
