75 CND & CDF Matupi Fundraising Hlunghlai Ngai In Tuah A Si

75 CND & CDF Matupi Fundraising Hlunghlai Ngai In Tuah A Si, Central Lairam, Lawngtlai, 2023 Nohawng 20 : 75 Chin National Day & Matupi Fundraising cu Central Lairam khualipi Lawngtlai khua CYLA Certual ah nihin ah hlunghlai ngai in an tuah. Hi Fundraising hi Nohawng 14 zaangleknak in thawk a si i, Nohawng 20 ah Final chuih in le 75 Chin National Day hman pah in Saikah FC le Vengpui FC an chuih i Vengpui FC nih an tei hna.

Hi 75 Chin National Day & CDF Matupi Fundraising hmannak hi Lairam cozah ah EM Pu JB Vanhoy nih khuallian in a hman pi hna, Pu JB Vanhoy nih cun ” Nihin kan nih Chin miphun hi mitlawm sihmanh usilaw, Chin National Day zong a voi 75 nak tiang phan kho dingin lam a kan hruaitu Pathian cu thangthat in um ko seh. Kan nih Chin miphun cu Burma ram, India ram, Bangladesh ram ah um hmanh usilaw unau kan si, Bawm, Pang, Lai le miphun dang hna zong Chin kan si dih. Hi kan miphun kan runven khawhnak dingah a biapi bik cu Pathian kan i tlaih ding hi a si.

India ran i kan um ruangah Vai kan lo, Kawlram kan um ruangah Kawl kan si lo. Kan unau le buainak lakah kan hmai ah dirmi CDF, CNDF, CNA le phu dnagdang hna kan bawmhchanh khawhnak hna hnga cu kan duhherh Pathian sinah kan phanhpi i, thlacamnak he kan ti khawhtawk in kan bawmh hna a hau” tiah a chim.

Pu Peng Lian MRCR Chairman nih lawmhbia chim pah in le Matupi peng in Mizoram ah phanmi report a chim ” a chimmi chungah Aizawl District ah Camp 7, chungkhar 294, milu 1270. Mamit District ah Camp 1, chungkhar 34, milu 167. Hnahthial District ah Camp 1, chungkhar 21, milu 86, Lunglei District ah Camp 12: chungkhar 463, milu 1767, Siaha District ah Camp 7, chungkhar 186, milu 800, Lawngtlai District ah Camp 19, chungkhar 1745, milu 3181, an dihlak ah chungkhar 1743 milu in minung 7271 kan si ” tiah a chim.

Hi caan hmannak ahhin hlasaknak siseh, Laamnak siseh, Laam hmuhsaknak, thlacamnak, biachimnak in hlunghlai ngai in tuah a si.