Baibal chung min relning remh a herh maw? Salai Van Biak Thang

Baibal chung min relning remh a herh maw? Salai Van Biak Thang, Baibal chung ummi min pawl zoh tikah a tlangpi in kan hmanning phun li in hmuh khawh an si.

Pakhatnak ah amah ning tein hmanmi an si: David cu David tiah amah ning tein kan hman. Lai rel in rel belte ahcun ‘Devit’ tiah rel i tial ding cu a lo. Pahnihnak ah min a awchuah kha Laiholh in kan tial: Hebrew kha Hebru, Numbers kha Nambar tiin tial an si. Pathumnak cu min kha Lai biafang bakin leh an si: Acts kha Lamkaltu, Revelation kha Biathlam tiin.

A dang pakhat cu a relning in kan rel lomi an si. Tahchunhnak ah, Moses nih nawlbia a va laknak tlang kha ‘Sinai’ tiah tial a si i cucu ‘Si-nai’ tiin kan rel. A awchuah taktak cu ‘Sai-nai’ ti a si. David nih a cal ah chai in a chaih i a teimi pa kha ‘Goliath’ a si i ‘Go-li-at’ ti si loin ‘Go-lai-at’ tiin rel a si.

‘Isaiah’ cu ‘Ai-sai-yah’ tiin kan rel i a dik ko. Cun, ‘Messiah’ zong ‘Me-sai-ah’ tiin kan rel i a tha ko. Nain, ‘Nehemiah’ cu ‘Ne-he-mi-ah’ tiin kan rel. A taktak cu ‘Nehe-mai-ah’ tiin rel a si. Cu he aa khatmi pawl cu: Obadiah, Zephamiah, Zechariah, Josiah tehna an si. A dang biafang zong tam nawn zoh awk an um hnga.

Jesus zong cu ‘Jesuh’ asiloah ‘Zisuh’ tiin kan hman ko i a dang pawl hi thlen an herh lem lo tiin a ruatmi um khawh a si bantukin aa dang tukmi cu a dik deuhning in kan i remh awk a si ko tiah a ruatmi zong um khawh thiam a si. A dik lei lam panh cu kan i zuam awk a si ko lo maw? The Lairam Times