Kan ID Card ning hin zei rammi dah kan si? Salai Van Biak Thang

Kan ID Card ning hin zei rammi dah kan si? Salai Van Biak Thang Ramchung kan i chawhvah tikah ‘Chinmi ka si’ tiah kan i chim. Ramleng kan chuah tikah ‘Burma rammi ka si’ tiin kan i chim. Cu kan i tinak cu zeitindah kan langhter khawh? Langhternak pakhat cu ID Card a si.

Asinain, kan ID Card a min kan zoh set tikah rammi sinak si loin rammi si le si lo cheknak catlap tu (ekdifiHom;pdppfa&;uwfjym;) a si. Mirang ca in lehtermi (notary) chung zongah ‘Citizenship Scrutiny Card’ tiah an tial. A sullam cu rammi sinak cheknak asiloah hlathlainak ca tinak khi a si ko.

ID Card chungah cun miphun (lu-mio) timi langhternak aa tel i cucu ‘race’ tiin an leh. Cu zawn ah cun ‘Chin’ tiah an tial. Cu zohnak cun ‘Chin’ kan si cu langhter khawh a si nain rammi sinak tu cu fehter khawh a si hnga lo. A ruang cu chek liomi lawng kan si caah ti khawh a si. Ramdang i pumpak nih an i tlaih ciomi catlap zoh tikah rammi an si cang hnu ahcun chek liomi asiloah hlathlai liomi tiin an langhter lo.

A tu kan i tlaihmi ID Card hi 1982 Rammi Sinak Phung ningin tuahmi a si i 1985 March 1 in chuahmi a si. Rammi a simi ti si loin rammi si dingah aa tlakmi asiloah rammi sinak ngeih khawhnak a tlingmi hna sinah chuah a si tiah a tial chih. 2008 Phung Hrampi Dal 345 ning cun hringtu nulepa Kawl rammi a simi paoh cu rammi sinak ngeih khawh a si.

Asinain, kan ID Card ning cun rammi sinak chek liomi lawng kan si rih i rammi sinak a tlingmi kan um rih lo tinak a si. Kan kaa in cun cu rammi, kha rammi tiin kan chim ko nain rammi tling sinak hmuhsak ding le langhter ding kan ngei taktak rih lo. Cucaah, a tu ID Card kan ngeihmi ruangah Kawl rammi kan si tinak kan fehter kho lo. Zei rammi dah kan si kun?#