Hakha Mirang Holh A Palhmi Cheukhat – Salai Van Biak Thang

Bia kan chim tikah Kawl biafang lawng si loin Mirang biafang tam ngai kan cawh. Cu lakah a palhmi an um len. A palh ti kan theih bu cun kan hman ti awk a si lo.
 
Biakinn chung i minung pathum hlasak kan thiah hna tikah Mirang biafang ‘trio’ timi kan hman. Kan chim tikah ‘tr-ai-o’ tiin a lai cafang ‘i’ khi ‘ai’ aw in kan chuah theo. A relning set cu ‘tr-i-o’ ti a si i a lai cafang ‘i’ khi ‘ai’ tiah chuah loin ‘ramri’ i ‘ri’ aw in chuah a si. Mirang biafang a palhmi kan hman lengmang nakcun Laiholh tein ‘pathum hlasa/hlasak’ tiah kan hman awk deuh a si.

Cataar lian deuh tuah kan duh tikah palasatik phun in nammi ‘vinyl’ hman a si. Khi zong khi ‘vi-nai-al’ tiin a aw kan chuah i a taktak awchuahning cu ‘vai-nal’ ti tu a si. TV kan zoh tikah a hmehnak kutken te zong khi ‘remove’ asiloah ‘remove control’ kan ti. A taktak cu ‘remote control’ ti a si. ‘Elite’ timi zong khi ‘i-liit’ tiah a awchuah a si nain ‘i-lai-t’ tiah kanmah duh in kan chuah thiamthiam.
 
Zingka thawhka kan eimi kha ‘breakfast’ kan ti i chun i kan eimi kha ‘thaithawh’ kan ti. A ngaingai ahcun ‘breakfast’ timi cu ‘thaithawh’ tinak a si. Zeiruang ah dah a sullam aa khat komi a dangdang caah kan hman hnga?#

Biakinn caanhmannak catial ning zohnak – I Salai Van Biak Thang, Thawngpang ca, cazual, mekazin le cauk chuakmi nakin mitam deuh nih zarhkhat voikhat kan rel pengmi cu biakinn caanhmannak (bulletin) ca a si. Biakinn pakhat le pakhat caanhmannak catialning aa khat cio lo i cu nih a langhtermi cu catial ning tlaihtleng kan ngeih lonak kha a si.

Hakha ummi mitam deuh i pumhkhawmhnak tipil Khrihfa bu panga, Thantlang ummi tipil Khrihfa bu pahnih hna i caanhmannak ca le zapi nih sawmnak (thlacamnak le thit-umhnak) ca zeimawzat chungin an catialning pawl zoh ti tuah hna usih.

Nithla le caan tialning: Biakinn pasarih chungah panga nih ‘2015 January 10’ (Kum Thla Ni) tiin nithla an tial i a dang pahnih nih ‘January 10, 2015’ tiin an tial. Hakha chuahmi The Chinland Post, Chin Tlangau le The Hakha Post nih ‘2015 January 10’ tialning an hman ve. Sawmnak ca tam deuh nih ‘2015 January 10 (Zarhteni)’ tiin an hman. Biakinn pali nih ‘Zarhpini’ tiin an tial chih i biakinn pahnih nih ‘Sunday’ tiah Mirang ca in an tial i biakinn pakhat nihcun zeihmanh a tial lo. Tam deuh nihcun ‘Zarhpi Ni’ tiah an then i Biakinn pakhat nih ‘Zarhpini’ tiah a fonh dih.

Biakinn tam deuh ahcun caanhmannak ca chung i nithla an tialning le pulpit cung cakhenh i nithla an taarning aa khat hoi lo. Tahchunhnak, caanhmannak ca chung ahcun ‘December 7, 2014’ asiloah ‘2014 December 7’ tiin an tial nain pulpit cung i cataarmi ah ‘7.12.2014’ tiah ‘Ni Thla Kum’ tiin an khenh. Nithla kongah a tawinak an hmaning le a saunak an hmanning aa ruang lo. Caanhmannak ca chung lila i thawngthanhnak an tialmi chung zongah nithla tialning aa ruan lo kha hmuh khawh a si.

Pumh thawk caan tialmi zoh tikah Biakinn pathum nih ‘10:00am’ tiin an tial i a dang pathum nih ‘Zing sml. 10:00’ tiah an tial. ‘Zing Sml’ tiin ‘S’ kha cafang lian a hmangmi Biakinn pakhat a um i a dang pahnih nih ‘Zing sml.’ tiah ‘sml.’ (sml le dehkhat) an hman.

Vawlei cung caan tialning hi a tlangpi in phun hnih ah then a si: ‘24-hour format’ le ‘12-hour format’. ‘24-hour-format’ timi cu zinglei suimilam 1 in zantim 12 tiang kha suimilam 24 a si caah 1-24 nambat hman a si. Tahchunhnak, zing 8 cu 8:00 tiah tial a si ko nain zan 8:00 cu 20:00 tiah tial a si. ‘12-hour format’ timi cu zinglei suimilam 1 in chun suimilam 12 tiang kha 1-12 nambat in tial i zanlei 1 in zantim 12 tiang zong kha 1-12 nambat in tial thiam a si. Hi ’12-hour format’ hman tikah zinglei caah ‘am’ le zanlei caah ‘pm’ kha hman chih a si.

Lai nithla tialning: Nithla tialning zoh tikah ‘Kum Thla Ni’ hi tam deuh nih hman a si. Lai caan tialning: Laiholh tein caan kan chim dan zoh set tikah ‘zing, chun le zan’ hi kan hman chih. Zinglei suimilam 10:30 cu ‘Zing 10:30’ tiah le zan a si ahcun ‘Zan 10:30’ tiah ‘Zing’ le ‘Zan’ telh in kan tial ahcun a fiang ko. ‘Chun 12:00’ ti zong kan hman thiamthiam. Hi zawn ahcun ‘sml (suimilam)’ hi hman a herh lem hnga lo.