Afghan Nu Pawl Siangsangrun Kainak Nawl Taliban Nih Phih
Afghan Nu Pawl Siangsangrun Kainak Nawl Taliban Nih Phih, Afghanistan ram ah cozah ngeihmi sianginn le pumpak sianginn hna ah nu pawl kainak le fimcawnnak nawl phih a sinak cu Taliban nih nihnihni ah khan an thanh, Taliban Minister pawl biachahnak ah siangsangruun dihlak le sianghleiruun hna cu theihternak an tuah hna, hmailei ah theihternak a um hlan chung cu hi biachahmi hi zulh dingin an thanh hna nak kong cu Taliban minister chimnak nawlngei Hafiz Zia Hashami nih a chim.
Tu bantukin nu pawl cungah an thiltuahmi hi UN le American telh in ramkip nih an dohkalh ngaingai mi a si.
” Nu pawl siangsangruun kainak kong ah phihkhamnak an tuahmi cungah American nih fak ngai in a dohkalh. Tuan deuh zongah nu pawl sianglairuun kainak nawl an phihkham hna, tu zongah nu hna cungah an thiltuah hi minung covo an phihkham bantuk a si ” tiah American Foreign Affairs Ministry in chimnak nawlngei Ned Price nih a chim.
Nu hna cungah an thiltuah hi minung covo zalonnak phihkham bantuk le i upat piak lo a si, Taliban hna cu vulei cung ram tampi nih kan cohlang lai lo tiah UN lei pehtlaihnak American Vice Ambassador Robert Wood nih thanhnak a tuah.
Human Rights Watch (HRW) zong nih, Taliban biachahnak cu a chiakha tukmi biachahnak a si, Afghan nu hna cungah fimcawnnak lamthluan khamtu le phunglam buartu an si tiah an chim ve.
