Lawngtlai District Hmawngbuchhuah
Khua Ah Arakan Army Nih Mi An Tlaih

Hmawngbuchhuah khua hi Lawngtlai District South, Chin State ramri pawng ah a ummi a si i, Lawngtlai in Km 86 hrawng aa hlatnak ah a um, hi khua i a ummi a tam deuh hi cu Mog miphun an si. Lawngtlai SP mawhphurhnak latu Pu C.Lalruatkima nih a chim ning ahcun, nikhatni zaanlei ah hmai aa hupmi meithal a kenmi minung pathum cu Hmawngbuchhuah khua ah an lut i, Hmawngbuchhuah khua nungak Mizinthui, ( A Mizo min Sangtei) he aa thiummi, Rachathaimo cu an kalpi, Sangtei pasal hi Tripura lei chuakmi a si, Mog miphun a si ve, amah hi Guwahati ah khuasa in ummi a si in an chim tiah a chim.

Zarhpini ah khan Sangtei le Rachathaimo hi an i thium, nikhatni ah Sangtei ule inn ah zaanriah an ei, zaanriah an ei dih inn lei an tin pah ah, hmai a hupmi hriamkeng an ton hna. Sangtei pasal cu an tlaih, a nupi hmai ah a pasal an tlaih ahhin Sangtei cu a au i, an lak ah minung pakhat nih meithal a puah caah, Sangtei i a thinphang i inn lei ah a tli, cu hnu ah minung pathum nih a pasal cu an kal pi.

Tu bantuk thilcan kong he pehtlai in Arakan Liberation Party (ALP) Center Committee Khai Mya Tha cu 2022 Sikpar 7 zaan ah Arakan Army nih an tlaihmi a si tiah Arakan Liberation Party nih an chim.

Khai Mya Tha cu Mizoram le Myanmar ramri Hmawngbuchhuah khua ah thitumhnak an ngeih, zaan hnihnak zaanriah an ei dih ah Arakan Army nih an tlaih tiah Arakan Liberation Party Vice Chairman Daw Saw Mya Ya Za Lin nih a chim.

Khai Mya Tha cu India chuak Arakan miphun a si, anih hi mitha a si, rithaisii lei zeihmanh a tawngmi a si lo, Arakan dohthlennak ah a ngakchiat te’n a tel a kan bawmhchanh, hi bantuk mitha an tlaih hi cu a fak tuk, nupi thitnak zaankhat lawng a si rih fawn, zaanriah an ei dih ah AA nih an tlaih, lung cu a tha hrim lo, minung kan covo cu i upat piak ding a si” tiah a chim.

A luancia Hniang thla zong ah ALP Center hruaitu pakhat simi Kai Paw Lin le Party chungtel simi tang riat kai lio Soe Min Naing hna cu AA nih an tlaih hna i nihin tiang an thlah rih hna lo tiah theih a si.

Kum 2022 Hniang – Sikpar 7 tiang ah ULA/AA nih ALP/ALA chungtel minung 17 an tlaih cang hna tiah Daw Saw Mya Ya Za Lin nih a chim.

Arakan dohthlennak ah pakhat le pakhat harnak kan i pek a si ahcun, i lungrualnak a hnorsuan lai, cucaah hi bantuk thil tuah hi ngol cang hna seh” tiah a chim chap. Hi kong he pehtlai in Arakan Army lei nih zeihmanh thanhmi an ngei rih lo.

Source: AIR Corr. Lawngtlai, မြေလတ်အသံ