India Ram Kumkhat Chung Sianginn 20000 Khar, Cawnpiaktu Sing 2 Leng Rian Ngol

India ram kumkhat chung ah sianginn 20000 khar a si, cawnpiaktu sing 2 leng phuah India cozah tang Ministry of Education nih cun India ram ah cawnpiaktu dirhmun kherhlainak report a chuah, kumkhat (2020-2021) chung India ram ah sianginn 20000 leng khar a sinak kong le cawnpiaktu minung sing 250000 hrawng nih an rian an chuahtak tiah an langhter.

India ram ah fimthiamnaklei karhlannak National Education Policy (NEP) kalpi a si i, Unified District Information System for Education Plus (UDISE+) report chuah a si fawn. Report nih a langhter ning ahcun kum 2020-2021 chung khan sianginn 20000 leng khar a si i, cuchung ah a tambik cu Private sianginn a si. Management fel lo ruang hna, chawva harsat ruang hna, siangngakchia tlawmtuk ruang hna zong ah a si fawn.

Sianginn khar a si ruangah cawnpiaktu siangcachim hna zong nih harnak an ton, cawnpiaktu kumkhat chung ah minung 250000 leng nih an pawcawmnak ah chambaunak an tong.

Kum 2020-2021 chung India ram ah cawnpiaktu sing 15.09 an um, 2021-2022 ahcun 14.09 ah an tla, Covid 19 nih cawnnak kongkau ah dawnkhantu a si tiah an langhter.

Unified District Information System for Education Plus (UDISE+) report langhter ning ahcun ramchung cawnnak inn lak ah 44.85% lawng nih Computer Facilities an ngeih. A tam deuh nih cun an ngei lo. A ngeimi lak ah 34% nih Internet Connection an ngeih. #Zalen