Lawngtlai Tho Ah Rev. Dr. Hla Aung (ES GCCF) Biatawi
West Lairam ah a hmasabik Tho kan tuah khawh cu a sunglawituk, Laimi nih a tu lawng kan ngeihmi a si lo. Pipu Calendar a si. Lai miphun hi miphun hme kan si lo. Laimi hi miphun pi kan si. Nunphung kan ngei, mah te’n a uk kho mi a thihruai kho mi , Miphun ngan nih an ngeihmi kan ngeih dih. Chin New Year (Tho) cu kum 1949 ah Chin cozah nih Tho (October) 26-27-28 ah tuah dingin phungning te’n an rak thanh. Nihin 29 i kan tuahnak cu zung kai mi hna nan i tel khawh kan zumh caah nihin hi kan tuahnak a si. Ralkap nih nawlngeihnak an lak tikah ralkap tang ahcun Chin New Year(Tho) cu kan tuah kho ti lo kum sau caan nawn tuah khawh a si lo hnuah tuah khawh a hung si than, kan philh dengmang cang, ralkap nih an policy an tlinter dengmang khi a si.
Vulei cung miphun kip nih hin nithla kumrelnak an ngeih cio, mirang nih nika in an rel, Judah nih thlapa in an rel, Laimi nih kan lothlawh cinthlak in kan rel, Kumhlun zunmi kha a ra laimi kumthar caah Pathian sin thluachuah hal le a thabik mi kha chuan a si i, innpa an hrawmh hna, hinih a langhtermi cu nun i hrawmh nunphung kha a si. Khrih zong nih a nun an kan hrawmh. A nungmi hna nih a thicia hna kha an philh hna lo, dohthlennak ah nunnak liammi kan nulepa kan unau, fanau vialte hna nihin ahhin kan in hlam hna kan in philh hna lo, upatnak le thlacamnak zong kan ngeihnak hi a si.
Kan pipu nih nunpi mi Kumthar (Tho) nih a langhtermi cu Pathian phung he aa zul, nunhrawmh le dawtnak hi a biapi tukmi a si. Vancung khuami ummi na pa kha na lungthin dihlak in na dawt lai, na innpa kha na dawt lai ti a si. Nunhrawmh phung hi vulei cungah a sangbikmi dawtnak a si. Nihin Tho kan tuahmi hi a donghnak sihlahseh hmailei ah zungzal in tuah khawh rak i zuam lengmang u.
