Lawngtlai Tho Ah Rev. B Zazawn Lai ( LIKBK GS) Biatawi
Nihin hi a voikhatnak Chin New Year (Tho) kan hman a si, Laimi hi Pathian thimmi kan si. Pathian ngeimi miphun kan si. Miphun kip nih mahle miphun nih ngeihmi phunglam an hmang, Israel miphun nih lanhtak sunhhlei an hmang, Laimi zong nih Kumthar (Tho) kan ngei ve. Hi kan nunphung hi Khrihfa si hnu zongah hman khawhmi a si ko nain West Lairam ahcun kan thei lo, kan hmang lo nihin hi hram kan thawk a si.
Missionary kalnak ngeimi miphun an um i kalnak ngei lo miphun zong an um, Laimi zong mirang Missionary hna kha East Lairam lei ah kan ngeih hna, West ahcun kan ngeih lo caah miphun dang an Missionary kha kan Missionary ah kan i hrawm khan a si ko.
Pathian nih amah riantuan dingin thimmi kan si. Laimi hi Pathian a hngalmi, Khrihfa kan si. Pathian ngeimi miphun zong kan si fawn. Pathian kan hngalh hlan ah kan pipu hna nih thing le lung kha an tih, an biak, Pathian kan Biak hnu ahcun tihnak a um ti lo. Nihin Laimi hi Pathian nih thlua a kan chuah, hlan pipu inn le lo le nihin inn le lo hi zoh tikah Pathian thluachuah a si, hlan ah khua khat le khua khat ke in i tlawnkainak zong kha a tu ahcun motor in i tlawnkai a si. Pathian nih thlua a chuahmi miphun kan si.
Nihin kan nunnak ah tah Khrihfa a si lo mi bantuk kan si sual maw. Khrihfa zumtu kan si bantukin kan nun hi tah zumlotu nih an kan hmuh tikah cawnawktlak a si maw, kan nun zoh in Pathian an zum duh ve hnga maw, kan tuahmi thil hi Bawipa ca ah a si awk a si. Pathian thimmi miphun kan si. Kan nunnak ah le kan khuasaknak ah cawnawktlak mi si usilaw, Khrihfa kan sinak lang seh.
