Mizoram Ah Chin Miphun Tengnge Ngawn Miphun Nih Lai Tho An Tuah

Chin miphun tengnge a si mi, Ngawn miphun hna nih Chin nunphung pakhat a si mi, Lai Tho cu, Mizoram Aizawl ah 6 Tho ah sunglawi ngai in an tuah tiah theih a si.

Hi an tuahmi hi Ngawn holh in cun Dawng Sawm Puai tiah an auh, hi tuahnak caan cu Mizoram Ngawn Community hruainak in, Aizawl, Mualhoih Picnic Spirt hmun ah an tuah i, Ngawn nunphung laam hna in sunglawi ngai in an tuah.

Mizoram Ngawn Community hruaitu pakhat nih mino tampi miphun biaknak thleidang lo in, hmailei zong ah harnak kan ton caan zongah, miphun, lungthin, phunglam hna he hmukhat ah kan i funtom chin nakhnga caah hi Tho zong hi tuah a si ” tiah a chim.

Tho hi hlan kan pupa hna nih an rak tuahtawnmi a si, Tho tuah caan cu cinthlak, fongvoi, thlai hna an zat dih Zing thla donghlei le Tho thla thlapa lai caan ah tuah a si.

Tho cu mirum sifak, mihrut dang lo in khuapi te nih hmunkhat te ah sunglawi ngai in tuah a si. Hi ahhin Lai laam, Lai hla hna sak a si.

Hi caan ahhin Guy from Chin in Benjamin Sum nih hlasaknak a ngeih, mino hna nih laam nak an ngeih i, hmunkhat te ah rawldum ti nak an ngeih hnu ah Ngawn Nunphung Dawng Sawm Puai cu dihter a si.