Jesuh Le Jazz Tahchunhnak – Dio JzJ

Kan Bawipa Jesuh vawlei a ratnak chan cu, sual sal ah a taangmi, nawlbia tangah khua a sami misual vialte kha, na sual loh, tiah khamh awk le luatnak pek awk ah a ra. Jazz ringawn vawlei ah a rak luh cu na solfa a palh eh, a phung si lo eh, timi a thiam deuhmi minung nih an theih tawk te kha i karkhumh chom in ri an khiahmi chungin, na palh lo eh, na tuahmi aa palh hrim lo eh, tiah luatnak pek awk ah a si ve.

Cucaah Jesuh le Jazz hi an Philosophy a tlangpi in aa khat. An i khah tuk hoi nak cu, Jesuh nih misual a ngaihthiam tikah sual tuah kha tha a pek tinak a si hrimhrim lo. Cu ve bang, Jazz nih na palh lo a ti chom in duh paoh thil tuah khi a si ve hlei lo. Theipar tha tlai naklei tu ah luatnak pek khi a si. A lungsaunak le a vel a ngantuk ruangah zeibantuk he paoh a um ti khawh tu khi a si. Jesuh nih misual nu kha a ngaihthiam i va sual ti hlah a ti nain sual kho lo dingin cun hramhram in lam a kham lo.

Ringawn chungah Jazz nih na palh lo an ti peng ko lai nain mizapi nih a tha in maw an ruah a chia in ti balte cu a um lai. A chia le a tha thleidannak cu Pathian nih a kan pek i, i fian chinchin khawhnak le tei khawhnak Power caah Thiangthlarau a kan pek.

Cu ve bangin, Jazz nih kan tuahmi kan i fian khawhnak dingah Mode a kan pek i kan tuah khawhnak dingah Mood a kan pek. Na ti men lai, ziah Jazz a um hlan in Mood cu a um cang lo maw? Khamh i fian lo ahcun i fian a har ngaingai lai. Khamh aa fiang ciami nih cun hi tihin i fian khawh a si hnga. A hramthawk ah Bia cu a rak um cang. Mood a rak um hlanah Jazz Philosophy cu a rak um diam cang. Minung nih an rak pemh lo bia.

Jazz hi Genre pakhat bantukin a chiami an um, nain a piangthar cangmi nih cun Genre ah kan chia lo. Concept in Genre vialte a hringsortu ah kan chiah. Hmuhnak a bi tukmi Tonal Box chungin a kan chanhchuahtu a si. A kan chanhchuah cang ko nain, nihin ni tiang vawlei ringawn tiluanpi hi Tonal rim a nam peng rih ko. Jazz nih a kan kalpi dingmi Modal chan, Bible bia in kan chim ahcun (N.T.) chan ahcun zalong tein thiangthlarau a simi Mood hruainak in tha chin leiah karhlan a si cang lai. Nihin kan vawlei pi hi kal hram aa thawk hnik lawng a si rih. (O.T.) rim thla a simi Tonal rim kan nam tuk rih. Rule le Theory kuttang ah kan um tuk rih. Jazz hi vawlei mit in a cuanmi hna caah cun a hlun ngai cangmi a tlau chom dingmi phun in ruah sual a fawi te. Vawlei mit in kan zoh caah a si. Thlarau mit a simi Philosophy or Concept in cun aa thawk ka lawng khi a si rih ti hi i fian kan herh.

Jesuh nih Judah mihna sinah, nawlbia an petu hna nan pu Mosses kha rak i fiang ulaw nan ka fiang ve ko hnga a ti bangin, Jazz zong hi Rule le Theory kan i fian taktak lawngah pemh khawhmi phun a si. Cucaah, Jazz pemh khawhnak ding ahcun Music Theory fakpiin cawn le hngalh a herh. Cațialtu keimah hrimhrim hi theihnak leiah a bautukmi ka si caah fian ding tlukin ka fian lomi a tampi. Fian kan herh ti vial lawng khi ka si ve rih.

Jazz hi Genre a si lo nain Genre pakhat bantukin hmuh a sinak aruang tu cu music thlarau mit in zoh loin vawlei mit in an zoh tawn caah a si. Jesuh zong kha vawlei mit in zoh ahcun a nu an theih a pa an theih, Judah miphun chungin a chuah an theih caah a Pathian sinak an hmu kho lo. Jazz zong vawlei mit in zoh ahcun nautat namnet ngai mi American minak miphun nunphung in duhsah tein a rak i semmi a si (Hi kong hi cu tuanbia a si, kei ka line a si ti lo caah Kevin Lal Thangvung sinah ka nawl i amah nih a rak thawhkehning tuanbia in a kan tial piak te lai). Tum tikah an hmanmi ringawn thilri tete le vuak thlakning tete an hman khunmi nunphung a um caah Genre ah an ruahnak a si. A fawinak chim ahcun vawlei Nunphung pakhat a ngei vemi a si caah, Philosophy in Jazz hi Genre a si lo kan ti khawhnak a ruang tu cu, zeibantuk Genre paoh kha Jazz chungah solfa aw phirh in aa tlum kho dih i Jazz nih a kau chinchinmi awphirh (Harmonic) in a langhter khawh dih. Jazz a si lomi pawl cu Genre an si hna caah an phun aa khah lo ahcun pakhat le pakhat an i rem kho ti lo. Anmah kua cio ah an um dih. Pakhat le pakhat common in an i hrawmkhawhmi aa hlat chin lengmang hna. Remnak leiah karhlang loin keimah tinak leiah kar an hlang. Software chawletthat
(sipuazi tama ) pawl nih hramhram in an fusion thanmii dah ti lo.

Jazz hi Genre a si lo caah Jazz ka uar ruangah Jazz ringawn lawngte ka tuah lai timi lungput siloin zeibantuk ringawn kan tuah paoh ah, na sual lo, na palh lo, a kan titu le ruahnak thar a kan petu a si ca tu ah zeibantuk Genre chung i a ummi ringawn minung paoh nih kan cawn kan theih a herh hrimhrimmi a si. Vawlei cung ringawn tumthiam pawl lakah zeihla phun paoh a tum kho dih an timi zeibantuk Genre paoh nih tum an fial khawhmi pawl khi Jazz musician an si.

Jazz hi a tuah kan thiam lo hmanh ah a philosophy tel i fian i a ngaihzia tel kan thiam cu a herh ngaimi a si. Jazz kan i fian ahcun zeibantuk hla phun paoh kan ei khawh dih lai kan sunhsak khawh dih lai. Anmah le an thawtnam cio kan țeh khawh deuh lai. Jazz na thiam ahcun zeibantuk hla phun paoh na tum khawh dih lai, timi cu phungthluk bantuk a si cang.

Jazz a thawtter tu solfa rimhmui cu (Tritone) timi a si i topic dang tein ka rak tial te lai. Zeibantuk hla phun zong a si rih lomi hla hranpi kha Jazz rim a nam khawhnak dingah Tritone timi muicicawh
( azawngtin ) kha thlak a si i Reharmonization or Chord Substitution in thaw taktak in kio a sinak kong cu a dang tein sermon te ding.

Jazz hi minung nunphung ah zeitindah an hman timi zong hi theih chih ahcun a țha ve ko. Vawlei cung ramkip miphun kip nih an ram le miphun hla (National Anthem) an sak tik paoh ah Jazz ringawn thilri le music an hmanbik. Aruang a um țheo lai cu vawlei cung ram paoh hi Independent an ngeih dih cu ta. A cheu cu mi ramdang pennak in a luat na, mah siangpahrang lila kuttang in a luat na, zei ram paoh luatnak a hmumi an si dih ko caah, National Anthem ah zalennak thlarau a ngeimi Jazz ringawn hi an hmannak a si kho. Ramkhat le ramkhat cozah lutlai pehtlaih hawikomhnak Diplomatic le Party an ngeih fate Jazz ringawn hi hman a si. Cozah bawi pakhat tuan i Jazz ringawn laam phunkhat tel thiam lo cu ningzah mualpho a fawite. Kawlram chung level tiang lawngah aa zii rihmi Lai bawi caah cun a herh tuk rih lo nain, ram hna va tha te sual sehlaw, ramkip bawi hna lak ah va thutdir ding dirhmun va phan te usihlaw, khi tik ah khin kan hmai kan i hup cawk te lai lo. Jazz cu a sang tukmi vawlei miphun kip hruaitu hna nih an i hrawmmi nunphung (zincehmuh) caah hmanmi a si.

Jazz kong a tial lengmangmi, cun ka tial lengmang rih fawn dingmi, hi Jazz kha Genre pakhat bantukin ka tanh ruangah siloin, ringawn vialte a kan khamhtu le luatnak a kan petu, a palh komi zong na palh loh a kan ti i a tha chinchinmi ringawn vawlei ah a kan luhpitu ringawn caah cun khamhtu Jesuh bantuk a si caah a si. Country, Pop, Rock tibantuk Genre luklak kong theih tuk a huammi zong ka si lo a tial zong ka ttial bal lai lo nain kan Lai ringawn thangcho ve seh ti ka duh caah Jazz kong cu ka theih tawk le caan ka pek khawh tawk ka tial peng lai.

Kai lawm.

THE LAIRAM TIMES VOL 1 ISSUE 19