Zatlang Nun ( Soiety) Salai Van Biak Thang
India ah zarhkhat hrawng caam hnu i Chiangmai (Thailand) vun phak cu, thetse rawn lak i zarhkhat hrawng vah i thabat tuk hnu ah Zakia inn i zanriah thaw taktak ei he aa lo, tiah kan upa pakhat nih a chim.
A chim duhmi cu rawl-ei kha si loin minung pakhat le pakhat kan i pehtlaihning a langhnak kan zatlangnun (society) a si. An i dannak pakhat cu dawr i thil kan va cawk ah a lang.
India ahcun dawr kan phak tikah thil cawtu nih thil zuartu kha ‘nan thil hi zaangfahnak tein in caw ko hna ning’ ti phun khin va nawl len ding phun khin an um. Dawr innka kan phak zongah an kan zoh set lo; mirh le chawnh zong um huaha lo. Thil cawtu a dir komi khi a hmu lo bantukin an um. Thil cawk duhnak lungthin a tlau dih. Tangka pek tikah artlang in dir zong a um lo. Mumal um lo khin duh salam taktak in um a si.
Chiangmai ahcun dawr kan phak tikah thil zuartu nih thil cawtu an kan donning a tha tuk. An kan donning le chawnhbiakning zoh tikah mirum ko kan lo, asiloah siangpahrang hna kan lo. An dawr chung ummi vialte cawk duhnak lungthin hoi hna kan lungah a chuak. Mah tluk cun an kan don i an kan chawnhbiak. Thil cawk a nuam.
Cucu kan innpa a simi ram pahnih i an zatlangnun hmanthlak a si. Aa dang ko. Cu chungah thil pakhatte kan hmuh khawhmi cu pakhat le pakhat i chawnhbiak, i upat le i zohkhenhning kong kha a si. Cucu ‘communication skills’ asiloah ‘customer service’ kan ti lengmangmi cu an si. Pumpak nih an thiam, an hman ciomi kha aa fonh tikah mibu asiloah zatlang nun ah aa cang i ‘society’ muihmai kan timi cu a si.
Khrihfa ram tiah theihmi Laimi kan ‘society’ hi tah, midang nih zeitindah an kan hmuh hnga? Khrihfa mui kan cuang hnga maw? Lam ton ah panh sirsiar tein a mirh i midang a chawnmi kan si cio hna maw? Biakinn chung kan i ton hna ah tah, kan muihmai, kan anka le kan cawlcangh zeidah a lawh? Cu vialte hmanthlak cu pumpak pakhat cio cungah aa ngatmi a si. Do a tlami zatlang nun cu pumpak in aa thawk i mibu ah a va funmi a si. Hawikom theihhngalh ca lawng si loin rian kan tuannak zongah cu tuahsernak cu man a ngeimi ziaza a si.
THE LAIRAM TIMES VOL 1 ISSUE 20
