Lai Women Association Nih Nu Fimthiamnak Lei Ah Thiamhlei Roca Pek
The Lairam Times, West Lairam, Lawngtlai, 28 Zing 2022 : Lai Women Association Gen. Hqrs; Lawngtlai nih Lawngtlai District chungah nu fimthiamnak lei ah thiamhlei hna cu conglawmhnak le roca an pek hna.
Lai Women Association Gen. Headquarters, Lawngtlai nih nihin 28 Zing 2022 ah Electric Veng, Lawngtlai an office ah tukum i Lawngtlai District chung nu, fimthiamnak lei ah thiamhlei teinak hmu hna cu conglawmhnak le roca peknak an ngeih hna. Hi caan hmannak ahhin CYLA Drugs Reduction Squad sinah rithaisii dohnak caah ti’n Rs. 3,000 an pek fawn hna. Hi caan hmannak hi Lai Women Association Gen. Hqrs; Lawngtlai President Pi V. Lalrinkimi nih a hruai.
Lai Women Association nih teinak hmun conglawmhnak caan ahhin Pu Joseph Lalhmingthanga Cinzah, General Secretary, CYLA nih a hmanpi hna, CYLA GS nih cun, LWA zong nih CDRS nih rithaisii dohnak lamthluan i thapet vennak caah chawva an pekmi cungah lawmhbia a chim. CDRS nih hma an laknak cu thawngchin in kalpi thluahmah a si tiah a chim fawn. ” Tu dirhmun ahhin kan mino, ngaknu le tlangval hna lakah rithaisii nih hmunhma a lak ngai ko, kan zumh lo le kan ruah lo, Khrihfabu le khuatlang ah aa pumpe mi hna zong rithaisii nih a kan sengtlaih ngai, kan ruah lo mi tlaih an si tawn” tiah a chim.
CYLA GS nih, CYLA le CDRS hna nih cun rithaisii he a sengtlaimi tlaihmi hna cu an sining le an hmanthlak phozar thluahmah dingin a chim. CDRS hmanlaknak ahhin LWA nih tuanpi le dirkamh a herh ko tiah a chim.
LWA Gen. Hqrs; Lawngtlai nih teinak hmu thiamhlei conglawmhnak le roca a pekmi hna cu,
- Cindy B. Lalremmawii d/o B. Lalremthanga, Lawngtlai Chandmary (MA Philosophy Top-10)
- Lalramngaihzuali d/o F. Sailuaia, Lawngtlai Chandmary (MA Economics Top-7)
- Lalrammawii d/o Kapmanga (D.El.Ed Topper) hna an si.
